أزاي تضرب c.v محترم؟

من طرف زائر الأربعاء مايو 07, 2008 2:49 am

إزاي تضرب C.V محترم ؟!هنقولك

صديقي الشاب العتره المجدع..صديقتي الشابه الدلوعه

إذا كنتم وكنتن قد انهيتم وانهيتن..(لا مؤاخذه هاتكلم بصيغه واحده وابقوا
قسموها علي بعض..ومحدش يحف) دراستكم بدءا من شباب الدبلون وانتهاءا
بجامعاتنا المحروسه المنحوسه..معقبين بفترة الجيش الخيش..أو انتظار فارس
الأحلام اللي مابيجيش..ظانين بذلك ظن السوء بأن الحياه ف العناب، والميه
غليت وع التلقيم يا حج،وان الشغل علي أفا من يشيل..فأسمحولي..الحدوته عكس
عكاس خالص..مش لشكي-لا سمح الله-في الأفا اللي هيشيل..لا..أنا ثقتي في
الأفا المصري ثقه عمشاء..أنما الشغل مش بس أفا....الشغل c.v!

فأزاي نضرب c.v محترم نخش بيه علي أجدعها مدير أو صاحب شركه..وانتوا يا
ولداه متعرفوش الفرق بين الأتش أر مانيجير وسحلجي الفرن البلدي

خليكوا معايه..كل واحد يجهز ورقتين وقلم..ابدأ:

1. اول بند هتلاقيه في خلقتك هو العنوان،ويجب ملاحظة تزبيط عنوان زواتي من
عينة شارع النباتات جردن سيتي..شجرة الدر الزمالك..كده،انما عتعشها جحر
أبو دومه..بير أم سلطان..علي عيني وراسي..بس أنسوا بأه

2. ثانيا تليفون البيت،حط نمرة أي عياده بالمنطقه اللي هتزبطها..يليها
الموبيل..اركن لحظه،هنا هنزبط نمرتين..واحده فناناتي من نظام زيرو عشره
ويليها سبع أرقام زي بعض،ثم نمرتك بالتبني اللي مفيهاش رقم يشبه
أخوه..ليه؟ده له تأثير ف المتلقي..يقولك الواد ده أو البت ديه ولاد
ناس..نمرهم متكلفه..أي نعم لما هيتصلوا هيتحلقلهم فيجربوا ع
التانيه،ساعتها قول أنك لسه بايعها أو متبرع بيها..اللي بعده

3. حيث الإيميل..ابعد عن الياهو والهوت ميل حط علي أي سايت تاني..ثم

4. اسم السياده..وده - للأسف - مضطرين نسيبه زي ماهوه مع رجاء التخلي عن
النعرات العائليه شويه..يعني بلاش الأفتخار أوي بالقاب من عينة النتن
والجعر!

5. نخش بأه علي البيرسونال داتا..أو المعلومات"السخصيه"

· تاريخ الميلاد..خليك مميز.. يعني يومك زي شهرك (مطلعتلوش شمس علي رأي
أمي)يعني مولود في شهر واحد..تبقي1/1 .. 12/12 وهكذا ولو حصل يا سيدي
واتعينت (ابقي قابلني) ولقوا أختلاف في شهادة الميلاد،قول ان يوم الولاده
غير يوم التسجيل

· الجنسيه..يا عيني بأه لو كتبتها أمريكاني،أوعي وشك..هتقولي طب أزاي..يا
عمي بسيطه..ليك أخ أتولد هناك،وطبقا لقانون الجنسيه الأمريكي لما يوصل سن
18 سنه هينقلهالك زي الفيرس تمام،ويبقوا يدوروا وراك بأه

· الحاله الإجتماعيه..أعزب علي طول الخط..اسمعوا كلامي ومتقطعوش رزقكوا بأديكوا..

· يلي ذلك التعليم واللي بيتعلموه..هتقضيها جامعة القاهره والمنوفيه وما
شابه..يبقي تسيب القلم وتقوم تخرج بره..انتوا مش وش نعمه..هتقولي طب
أزاي..اكتب جامعة أكتوبر..مصر للعلوم..الجامعه الألمانيه..كده..هتقولي
ماهو هيطلبوا أصول الأوراق.. يا إخوانا بس أمضوا العقد وأتفرج بعد
كده..اللي خايف يخليه

· نخش ع الكبيره..سجل أعمالك فيما مضي..اشتغلت فين يعني..؟؟؟؟؟؟أنا عارف
انه سجل اسود ومايشرفش..لكن أبدء من الأحدث ف الأقدم..أول هام تبعد عن اي
مؤسسات أو هيئات كبري يسهل التأكد من أنتسابك إليها من عدمه..يعني مسقطليش
علي موبينيل ولا مايكروسوفت وتكتبلي أنك كنت ماسك التيكنيكال سابورت
عندهم..إنما عليك وع الشركات الصغيره متعددة المقار،قلبك مش مطاوعك ومقلق
برده،اذا عليك وع الفبركات..يعني مثلا شركه اسمها سن باور تبقه شغاله ف
البوتاجازات..ايس باور تبقي تكييفات وهكذا..وحط نمر أصحابك عشان اذا حد
اتصل (بس لو اصحابك باعوك مليش دعوه)

· بالنسبه للتيتل أو المسمي الوظيفي بتاعك (شفت بأه أهو جه اليوم اللي
بقالك فيه تيتل)عندكم كام بق من الأبقاق اللي ماشيه في الشارع اليومين دول
ومحدش فاهم منها حاجه..كذا سوبر فيزر(ألحمها في بق واحد)..كذا
ادفيزر..وكله ماشي

· يلي ذالك الكمبيوتر وخبراته، وجدير بالذكر والتذكير انك لمه تقع في
الأنترفيو ويجي ذكر الكمبيوتر بالخير..رد ب الخنفان ..."الخنفان"...اكرر"
الخنفان" فقل كوم-يوتر ، تقل كومب-يوتر، خليكوا ولاد ناس وانسوا المحشي
والبتنجان المخلل شويه

· يلي ذلك اللغات..امتلئ فخرا وعزا بأن لغتك الأم هي العربيه..!(عربيه كام
سليندر بأه)ده علي حسب قرايتك وأتطلاعك.. وان كنت متأكد ان 90% من شبابنا
لغاتهم متحصلش التوك توك!!..يليها..أيوه كنت عارف إنكوا هتقعوا ف
الكمين..اوعي حد يكتب الإنجليزيه..بلاش رطرطه..ارشق ف لغه محدش من لجنة
الممتحنين يستجري يبمبك معاك فيها..خش ع الأردي..السواحلي..إنما
انجليزي..ده النهارده قرص العجه مكتوب عليه وان باوند!!

· وأخيرا كورساتك يا معلم..أي كورس دخلت فيه حتي لو كان كورس
دوا..اكتبه،عشان يتفهم انك عيل ابن أكابر بتقضي الأجازه مابين مارينا
وكورسات الصيف .

واحده بنت حلال تسألني : هما يعني الممتحنين هيخيل عليهم الكلام ده..؟

أقولها:طبعا لأ يا كتكوته..هما عارفين ان كله قرع..هو المعيار مش الكفاءه انما مين يقرع تقريعه ماتقرعتش قبل كده.

واحد ابن حلال يسألني : هوأنا بعد ده كله هبقي جدير بالوظيفه..؟

اقوله : انت نبيه يا بني والله..طب وهو حد قالك ان اللي فيها دول جديرين
بيها..؟ أهي دايره وبتدور..واحد بيمتحن يلزمه واحد يسأل ، تلزمه c.v
مضربه..عشان واحد يتعين..عشان يجيله يوم ويمتحن واحد هيتسأل اللي هيلزمه
برده c.v مضروبه عشان.........................

كفايه انتوا وجعتوا قلبي معاكوا !!