منظمة sife فى جامعة بنها بتعمل ايه؟

من طرف nastooooo1512 الخميس مارس 05, 2009 1:52 am

فى منظمه اسمها sife egypt موجوده حاليا فى جامعة بنها بتعمل دعايه ليها
المنظمه دى موجوده فحوالى 55 دوله حول العالم وبتهدف لمجموعه من الاهداف اللى بتسعى ان يحققها وتبقى موجوده فى شباب الجامعه
هى عباره عن مجموعة مشاريع بيشتغل فيها الطلبه وينفذوها وفى ناس رعاة رسميين بيمولوهم لده
طب انت كطالب هتستفاد ايه منها انت هتشتغل باديك وتكتسب خبره وتنمى مجموعة مهارات عندك
زى مهارات الاتصال ومهارات العمل الجماعى
زائد انك بتعمل مشاريع صغيره ممكن انت تستفيد منها وتنمى المجتمع المحلى بتاعك وهو كمان يستفيد
او انك مثلا تنمى موارد اسره محدودة الدخل داخل القرى ومثال على المشاريع مش كلها طبعا
موضوع قش الرز وتحوبله لسماد عضوى
او انك تعلم اسره من ستات البيوت يعملوا الصابون السايل فالبيت
وفى جوانب تانيه من الاهداف وهى
مهارات النجاح بمعنى انك تخلق من نفسك او من حد حواليك شخص ناجح او من مجال عقيم انت بتدرسه تبتكر فيه عشان تحوله لحاجه ناجحه الناس محتاجاها
فى كمان من الاهداف اخلاقيات العمل ازاى لو انت بتشتغل فمكان وعندك مدير رخم حبتين تكسبه ازاى
وتكسب زمايلك او تحفزهم على الشغل ازاى
فى كمان التمويل ممكن تكتسب خبرات فانك تنزل بنوك او شركات عشان تقنع المسئولين عنها انهم يمولولك مشروع هتقنعم ازاى لازم يكون عندك مهاره لده او تتعلم ده
وفنفس الوقت انت يعتبر بتكتسب خبره فالتسوبق لانك بتبيع ليه فكره
طيب هو هيستفاد ايه عشان يديك فلوس
هو ممكن يستفاد اولا دعايه مجانيه ان يتحط اسمه كراعى رسمى لمشروعك وطبعا بيتشال من عليه جزء من الضرائب
كمان يوم ما يحب ياخد عماله كويسه يفكر ياخد شخص زيك اشتغل باديه وهو لسه فالجامعه وعنده خبره ومهاره
اسم المنظمه نفسه كبير وتقيل انك تحط فالسيره الذاتيه بتاعتك انك اشتغلت معاها
فى مسابقه وطنيه جوا مصر للمنظمه وفالمسابقه دى بتعرض كل الجامعات المشتركه فالمنظمه المشاريع بتاعتها
طبعا لما انت تحضر هتستفاد كتير من الافكار المطروحه
زائد انك كمان ممكن تاخد فكره تنفذها بنفسك كمشروع خاص بيك انت وبس وطبعا هيكون بقى عندك خبره فده لانك شوفت ازاى ممكن تجيب تمويل
ازاى تقدر تعمل خطط بديله
ازاى تعمل دراسة جدوى
ازاى تتخطى ازمه اتعرض ليها المشروع بتعك
المحكمين فالمسابقه هما مجموعه من رجال الاعمال زى نجيب سويرس مثلا او احمد جهينه او مسئولين النساجون الشرقيون
طيب اللى هيكسب فالمسابقه هيعمل ايه
هيروح كاس عالم sife ودى بتبقى فى احد الدول المشتركه فالمنظمه زى ايطاليا مثلا
فالمسابقه العالميه بيعرض ال55 دوله مشاريعم اللى فازت فالمسابقه الوطنيه المحليه ليهم واحنا كمان بنعرض مشاريعنا
بنها بتعمل تبادل طلايى مع احد جامعات العالم وبنستقبلهم عندنا وبنبعت فوج من عندنا كله تحت راية المنظمه
بجد يا جماعه حاجه حلوه اوى انا اشتركت وفى ناس كتير اشتركت
احب اشوفكو معانا

اللى عاوز يشارك يبعتلى وانا هكون سعيدة بوجودكوا معانا

اختكم ناستو

من طرف زائر الخميس مارس 05, 2009 5:35 pm

أنا بصراحه أول مره أسمع الأسم ده
وأول مره برده أسمع عن الطلاب اللي بيجوا يدرسوا عندنا من بره ممكن أحنا نروحلهم أنما هما ميجولناش د رأيي
بس الأفكار ديه عجباني أوي
وهتبأه خبره كويسه أوي
أنا هفكر ف الموضوع ده

من طرف **A.S.Shiko0o0o** الخميس مارس 05, 2009 6:32 pm

طيب قوليلى يا ناستو انتى انتى عملتى ايه

ودورك انتى ايه فى الموضوع

اصلا انا الفتره الاخيره دى حسيت ملل مفاجئ بين افراد الشعب كله قرفان كله زهقان كله طهقان

مش فاهم ليه

ممكن احنا نعررفهم ده يمكن نكون سبب فى كسر الملل ده

يا مسهل

من طرف nastooooo1512 الجمعة مارس 06, 2009 1:10 am

انا يا شيكو ماسكة حاجة اسمها o.c

يعنى لجنة التنظيم انا وواحدة كمان فى كلية اداب

ودورنا اننا ننظم كل اللقاءات والوفود اللى جاية للجامعه عندنا

ومقر المنظمة عندنا فى كلية طب

وبالمناسبة فى حفلة كبيرة هتقام يوم17/3

وهيكون فيها المحافظ

ورئيس الجامعه

ودكتورة فاطمة منسقة المشروع فى مصر

ده ميعاد مش اكيد

بس انا هعرفكم المواعيد بتاعت اللقاءات الخاصة بسايف اول بأول

وعموما لو عاوز تشترك عرفنى

وهتاخد كورسات تنمية بشرية وتنمية مهارات فور فرى من اول ما تبقى عضو

اختكم ناستو