"عشان انت مصرى"_لاحمد فؤاد نجم

من طرف **silent** الثلاثاء أكتوبر 30, 2007 3:34 am

"عشان انت مصرى"_لاحمد فؤاد نجم
على أد ما الكلام اللي كتبه يضحك على أد ما هو محزن على أد ما هو حقيقي للأسف

عشان انت مصرى_احمد فؤاد نجم

عشان انت مصرى لازم تعانى

وتفقد كرامتك بكل المعانى

وتحرق فى دمك سنين مش ثوانى

واوعى تصدق كلام الاغانى

بتاع الحضاره وكانى ومانى

ده كله هجايص مايدخل ودانى

عشان انت مصرى العذاب بيناديك

بتبدا فى يومك حاجات بترازيك

فى نومك فى قومك تعكنن عليك

تضايقك ولسه العماص فى عينيك

مافيش ميه تشطف صابونه فى ايديك

وجسمك ملزق وريحتك عاديك

فتلبس وتنزل وفيك اللى فيك

ورايح لشغلك حتحتاج مواصله

ادى المترو واقف وكهربته فاصله

وفى الميكروباص خناقه وحاصله

اوتوبيس فرامله عايزالها وصله

وتوك توك ده تايه ومحتاج لبوصله

بتوصل لشغلك بدم اتحرق

فى زحمه وكتمه وحر وعرق

رئيسك سايبلك كومه ورق

ده غير دمغه ضايعه وملف اتسرق

وفى كام مواطن عامللك قلق

بيشكى تقول له روح اندعق

وعركه وهوجه وشاى اندلق

ومخك خلاص من الصداع اتفلق

هترجع لبيتك ده لو كان فى بيت

هتوصل هتندم ياريتك ماجيت

مراتك بتصرخ خلاص استويت

عيالك بتطلب وهات كيت وكيت

تزعق تهاتى ياناس اتهريت

ولاحد سامعك مهما هاتيت

عشان انت مصرى وده للاسف

فلازم تاسى تعيش تتقرف

وكل الاساسى فى حياتك ترف

فتنسى الكرامه وتنسى الشرف

وتسرق وتنصب او تنحرف

ودمعك بيجرى وجرحك نزف

مش انت اللى مصرى؟؟؟ جتك القرف

من طرف **ESSS** الثلاثاء أكتوبر 30, 2007 10:36 am

هو فعلا معظم الكلام حقيقي او يمكن كله بس فيه مبالغة شوية .
شكله كدة كان كاتبه في يوم نحس على الآخر هههههههههههه .
بس موضوع جميل للأمام دايما.

من طرف **DeBo0o** الثلاثاء أكتوبر 30, 2007 8:11 pm

الله الله الله الله بجد .. عليك يا فاجومى

ده الشاعر المفضل لديا يا جماعه .. الراجل ده مصرى شاف الزل و الاهانه و اهوال فى المعتقلات

بجد حد لازم الكل يحترمه و اعتقد ان كلامه واضح و صريح و يعتبر من السهل الممتنع

بجد شكرا يا سايلنت علشان احضرتلنا القصيدة الجميله دى ... و مستنين الاعمال اللى جايه ان شا الله