الأميره قطقوطه

من طرف زائر الخميس أبريل 02, 2009 12:14 am

الأميره قطقوطه

كان فيه مره زماااااااااااااااااان
مملكه كبيره
وكان فيه جبل ف وسط المملكه ديه
وفيه وحش ساكن فوق الجبل ده
وكل كام يوم ينزل من ع الجبل
يخطف كام واحد ويخدهم معاه فوق...
وياكوووووووولهم....
وكان الملك عنده بنت وحيده أسمها الأميره قطقوطه
وكانت الأميره قطقوطه بتحب الشاطر حسن...
وكان الواد سايق الهبل ومنفض للأميره قطقوطه خالص
لحد م الملك أعلن الخبر ده..........
..اللي هيقتل الوحش..هيتجوز الأميره...وهيبأه الملك من بعده...
حسن أول م سمع كده قال..يانهار أزرأ..هيبأه الملك...وقام واخد السيف والدرع والكزالك والمطاوي..وطالع الجبل عشان يقتل الوحش...
أول م الناس شافته وهوه واخد الأسلحه ديه كلها معاه..عرفوا أنه طالع للوحش..ف عمالين يقنعوه أنه يرجع وأن الوحش قتل لحد دلوقتي يجي خمسميت واحد..بس هوه مرجعش وفضل ماشي...وكان له واحد صاحبه عارف أنه بيحب قطقوطه..اول م شافه طلع يجري عليه وقاله..أرجع يـاحسن عن اللي ف دماغك..دي قطقوطه ديه ولا تستاهل أنك تضحي بنفسك عشانها..
ف قاله..لأ يا معتمد متقولش كده..أعقل..دي الأميره قطقوطه..يعني المملكه كلها يـاجدع..وأنا مش هسيب حد ياخدها مني...
ف قاله..هيه مين ديه؟؟..
قاله..المملكه طبعا يابني..
وضحكوا هما الأتنين..وقبل م حسن يمشي..صاحبه خده بالحضن وقاله..مترجعش غير والمملكه ف جيبك يـاصاحبي...
ف حسن رد عليه وقاله..عيييييييييييييب وبعدين منا أصلا يعني لو مرجعتش والمملكه ف جيبي مش هرجع أصلا..الوحش هيكولني أفهم بأه يـاغبي..يااااابااااي عليك...تصدق يله أنا ممكن مرجعش عشان مشوفش غبوتك ديه تاني..غور بأه من وشي...
وزقه من فوق الشلال...الله يرحمه.......
ومشي ناحية الجبل...
وأخيرا وصل..والناس ماشيه وراه عمالين يقولوله..يابني أعقل بأه وسيبك من الكلام الفاضي اللي ف دماغك ده...
وهوه ولا هو هنا...
والأميره قطقوطه جت...
قطقوطه من بعيد..حسسسسسسسسسسسن....أبو علييييييييييييييييييييي..
ووقفوا الأتنين مع بعض وقالتله..مش عايزه أحس بالذنب ناحيتك..قول من دلوقتي أنك بتعمل كده عشان المملكه مش عشاني...
ف قالها..لأ أنا بعمل كده عشانك يا قطقوطه يـاحبيبة قلبي...ولو مت هبأه مت وأنا بحاول أوصلك..
قطقوطه أتكسفت شويه من نفسها..وحطيت ف عنيها حصوة ملح وقالتله..إن شاء الله هترجعلي بالسلامه يـاحسن....
ومشي حسن وهوه بيضحك وبيقول ف دماغه..عبيطه أوي البت ديه...
وطلع الجبل ووقف قدام المغاره اللي فيها الوحش..
وكان سكان المملكه كلهم تحت..اللي حاطه أديها علي بقها وبتعيط ع الجدع..واللي فرحان فيه..واللي واللي..وفيه ناس جايين يتفرجوا بس..بيحبوا أوي الحاجات ديه..ودول كانوا أكتر ناس موجودين...
حسن وقف قدام المغاره وزعق وقال..أنتا يـاعم الوحششششششششششششش أنتا..لو كنت وحش صحيح أطلعلي..وديني لكون ماسح بيك بلاط المملكه..والله العظي...........
وفجأه طلع الوحش من المغاره وموت الشاطر حسن!!!!!!
والناس رجعوا بيتريقوا علي الواد اللي كان فاكر نفسه هيعمل اللي محدش عمله..وقالوا كمان أن هو مكنش شاطر ولا حاجه...

والأميره قطقوطه أول م سمعت الخبر أغمي عليها وفضلت منهاره كتير اوي كانت فاكره أن الشاطر حسن عمل كده عشانها متعرفش أنه كان طمعان ف المملكه بس وأنه بتاع مصلحته بس وفضلت فاكراه كتير..بس لما عرفت الحقيقه بعد كده ندمت علي كل يوم زعلت فيه عشانه..

وف يوم قابلت الأمير هيثم أبن ملك البلد اللي جبنهم واللي كان بيحبها من زمان وهي مش حاسه بيه..بس المرادي هي حبته وقالتله أنها موافقه ترتبط بيه بس لازم ينفذ شرط أبوها الملك الأول عشان يوافق علي خطوبتهم..قالها أيه الشرط ده..قالتله وهي خايفه عليه أنه لازم يقتل الوحش اللي مهدد كل سكان المملكه..وقالتله كمان أنه مش هيقدر وأنها مستعده تهرب معاه ويروحوا أي بلد تانيه ويعيشوا هناك حياه بسيطه..قالها ليه ده كله..وقام مطلع الموبيل بتاعه وأتصل بأبوه الملك وقاله علي كل حاجه وأنه هيتجوز الاميره تكتوكه وقاله كمان علي الشرط اللي أبوها عامله عشان يرضي يجوزهاله وف اخر كلامه طلب من أبوه الملك أنه يساعده ف الموضوع بتاع الوحش ده..قام أبوه الملك بعت 5 طيارات أف 16 قذفوا الجبل اللي الوحش ساكن فيه بالقنابل النوويه..ف الجبل أتفرتك حتت والمملكه كلها أتدمرت..وكل الناس اللي كانوا عايشين فيها ماتوا...

وبعد أربعين سنه قررت الأميره قطقوطه أنها تخرج من القبو اللي تحت القصر بتاعهم واللي حماها من الأشعاع بتاع القنابل النوويه طول السنين ديه كلها..وبتفتح باب القبو لقت قدامها هيكل عظمي مرمي ع الأرض وأفتكرت ساعتها أنها وهي بتجري زمان عشان تلحق تستخبي من الأنفجار دخلت القبو وقفلت الباب بسرعه وكان الأمير هيثم جاي وراها وعمال يزق الباب بكل قوته ويصرخ افتحي يـاقطقوطه هموت..وهي تقوله طب ابعد عن الباب شويه أصله بيتفتح لبره..بس هو مكنش سامعها....

وتوته توته فرغت الحدوته

prince

من طرف **A.S.Shiko0o0o** الجمعة أبريل 03, 2009 12:34 pm

نسيت تقول فى الاخر حلوه ولا منتوته

هههههههههههههههههه

من طرف زائر الأحد أبريل 05, 2009 11:33 pm

بس أيه رايك ف النهايه ديه جديده علي فكره
الأمير مات عشان مسمعهاش
والشاطر حسن برده مات مع انه كان واثق ف نفسه اوي
بس هو مين عشان يقدر ع الوحش ده
وهي عاشت وحيده طول عمرها مع أنها أميره وكل الناس بتتمني تقرب منها
حكايه مأساويه اوي يا جدعان

من طرف eslamy sr 7yaty الإثنين أبريل 06, 2009 12:35 am

ههههههههههههههههههههههههههههههههههههههههههههههههههههههههههههه
ملتوته بأ
ايه رايك
مش لازم يعنى اقول حلوه وانافق
يلا قول واحده تانيه

من طرف زائر الإثنين أبريل 06, 2009 12:48 am

أقولك يا ستي
مره كان فيه واد راكب عربيه سزوكي وبعدين جت ركبت قصده بنت مش حلوه أوي عاديه بس عنيها اللي مكنتش عاديه غرق جواهم وباه يشوف البنت ديه حلوه وبعد كمان شويه لقاها حلوه اوي وبعد شويه كمان لقاها ملهاش حل عاش أحلي عشر دقايق ف حياته وكأنه خرج من الدنيا ورجع تاني
وخلص الطريق ونزلوا الأتنين من العربيه وهيه مشيت وهو فضل يحلم باليوم اللي هيشوفها فيه تاني
وتوته توته فرغت الحدوته
ايه رايك بأه
دي عشان خاطرك انتي بس

من طرف **takatiko** الأربعاء أبريل 08, 2009 7:35 pm

ههههههههههههههههههههههههههههههههههههههههههههه

من طرف زائر الجمعة أبريل 10, 2009 2:44 am

طب أنا هقول حاجه تانيه

مره كان فيه واحد ماشي ف الدنيا تايه بيدور علي حاجه مش عارف هي أيه ولا شكلها ايه ولا يعرف حتي يلاقيها فين بس هي حاجه ناقصاه ولازم يلاقيها وفضل ماشي لف الدنيا كلها بس معرفش أيه الحاجه ديه لحد ملقي نفسه ف أخر حته ف العالم ولقي قدامه بحر كبير اوي ملوش اخر وكان فيه مركب صغير موجود ع الشط قام فكر شويه وبعدين حب يجرب يمكن يكون اللي بيدور عليه ف البحر مش علي الأرض وركب المركب وبعد كتيييير ولما حب يرجع معرفش السكه منين وحس أنه خلاص هيكمل حياته كلها ف المركب ده وف قمة يأسه شاف قدامه مركب تاني بعيد اوي وكان فيه عروسة البحر واقفه ولابسه فستان ابيض أول م هو شافها قعد يتنطط ويرقص وحس انه أخيرا لقي حد يشاركه وحدته وفضل يأدف ويأدف لحد موصل للمكان اللي عروسة البحر موجوده فيه بس هي كانت ساعتها بعدت أوي وفضل يأدف تاني ويقرب ويقرب بس كل مكان بيقرب منها يلاقي نفسه لسه بعيد كانه متحركش من مكانه بس هو كان ف كل مره حماسه بيزيد وقال لنفسه أنا أصلا تايه بس لما أكون بدور عليها وماشي علي طول ناحيتها مش هكون ساعتها تايه د أنا اصلا وصلت دلوقتي وهو ده نصيبي اللي كنت بدور عليه ويرجع يأدف تاني والموج علي أوي بس هو فضل يقاوم لحد مجت موجه كبيره قلبت المركب بتاعه وهو اصلا مبيعرفش يعوم وقع ف الميه وفضل ينزل وينزل وينزل وقبل ميغرق لقي عروسة البحر قدامه حضنته وطلعت بيه علي طول لفوق ولما فاق لقي نفسه قاعد قدام جهاز كمبيوتر وبيكتب كلام وهو مش عارف هو بيكتب ايه

وتوته توته فرغت الحدوته