ابكى على اللبن المسكوب

من طرف **USA** الخميس مايو 08, 2008 4:30 pm

لقد احترت كثيراً فى وضع عنوان لهذه الرواية التى بدأت فى تأليفها منذ فترة وجيزة

فلم أجد عنواناً أفضل من هذا العنوان وهو

ابكى على اللبن المسكوب

هذه الرواية تناقش حال مجتمعنا الآن وحال الشعب وبالأخص حال الشباب ومشكلاته عسى أن نجد لها حل معاً

من طرف **USA** الخميس مايو 08, 2008 4:34 pm

الحلقة الأولى

بعنوان

استفتحنا

قديما في حكم الفراعنة كانت الحكمة تؤخذ من افواه الكهنة
في حكم الرسول و الخلفاء كانت الحكمة تؤخذ من اولي الامر
في حكم الاتراك كانت الحكمة تؤخذ من العلماء و المثقفين
مع تطور امبراطوريتنا العظيمة و مع تتابع حكامها جاءت فترة كانت الحكمة فيها تؤخذ من افواه المجانين
اما الان فبعد تتطورات الاوضاع في الداخل و الخارج من مجازر و حروب و قتل اطفال و هتك عرض مسلمات و تدنيث اماكن دينية هذا كله واكثر ادى الى انقسام شعبنا الى ثلاث اقسام
الحكومة و اتباعها
مجموعة المقاومة
المغلوبين على امرهم
القسم الاخير يمثل حاليا معظم شعبنا العظيم لكن بداخله صرخة لا يستطيع اخراجها لأسباب يطول شرحها لذلك اكتفى بمشاهدة ما يحدث حوله
اتأسف لم يكتفي بالمشاهدة ولكنه يحاول نسيان مايرى ايضا لهذا اتجه الى اسلوب جديد و هو السطل
لذلك عندما نقول من اين نأخذ الحكمة الان ؟؟
اسمحوا لي ان اقول لكم خذوا الحكمة من افواه المساطيل
و اسمحوا لي ايضا ان اقدم لكم نموذج حي تأخذون منه الحكمة
مسطول للابد ….. واعذروني هذه اخر مرة اكتب لكم
فسيتولى هو الكتابة و حق الرد و النشر وربنا يستر

الى اللقاء مع الحلقة الثانية

من طرف **USA** الخميس مايو 08, 2008 6:00 pm

الحلقة الثانية

سنة حلوة يا عبيط

مساء الفل يا رجالة معاكوا اخوكم مسطول للابد …هاتسألوني ده اسمي الحقيقي ولا الهمبكة هاقلوكوا مش عارف بمعنى اصح مش فاكر هاتقولولي جاي هنا ليه هاقولكوا مزاجي وم الاخر كده و فالانجاز انا جاي احكلكم على يوم من الايام الكتير اووووووووووي اللي شوفتها ….اتفقنا …طيب خمسه كده الف سيجارة واجيلكوا …… تمااام ابتدي احكيلكوا
بداية اليوم عادية خالص صاحي نشيط خدت التست مورنينج بتاعي و اديت رينج للدكتور صاحبي ……. اسف ياجماعة انا قصدي بالدكتور واحد صاحبي بيقعد على باب بيته بيبيع بيرشام ما علينا اتصلت بيه قولتله انا جاي اخد منك التموين قالي امين مستنيك
روحت مستبح بسجارة حلوة تاني وروحت نازل عميان كل اللي يشوفني في الشارع يضرب كف على كف مش عارف ليه؟؟
مع اني كنت مسرح القصة المهم روحتله وبعد امبوااة و امبوااة و السلامات قالي تعالى نطلع نقعد مع بعض شوية
قولت شغااال لقيته محضر وليمة جامده جدا كل ما لذ وطاب من برشام لحشيش لبانجو كله تمام بقوله يابني ايه ده كله
قالي يابني الحاجات دي موجوده بالهبل و ف اي حتة ده ناقص ينزلوها مع بطاقة التموين
المهم اتعملنا و بنتفرج على التليفزيون قناة جايبة الاخبار و الضرب في فلسطين و مناظر جثث قولتله يابني حول على حاجة تانية
جاب قناة فيها برنامج عن البهائيين و اسقاط حقهم في القضية قولتله ايه ياعم ده حول ياعم
جاب قناة فيها بت روشة وبتهني الشعب بالكريسماس
ايه ده صحيح السنة الجديدة قربت قولتله احنا لازم نحتفل قالي هانعمل ايه
قولتله احنا ننزل وسط البد و هاسهرك سهره جامدة فحت قالي بيس يا معلم
فعلا خدنا عربية سوزوكى ونزلنا وسط البلد و احنا في الطريق وقفتنا لجنه
قولت ربنا يستر احنا مكناش شايفين قصدنا و غير كده كل اللي في السوزوكى متأكدين ان احنا خربنين
كنا سبعة في العربية … جيه الظابط شاف رخص السواق و بعدين بص على اللي راكبين و فجأة عينه ركزت علينا قوي
قولت خلاص احنا اتمسكنا …راح الظابط فتح الباب و شخط و قال انزل يالااااا
كنا قعدين تالتة في الكنبة انا و صحبي و واحد محترم كده و دقنه طويله و باين عليه التدين
فأنا بستعد اني انزل و بتشاهد راح الظابط شاخط تاني وقال انت يا ابو دقن انزلي هنا
طبعا انا اتمسمرت مكاني في العربية مش مترجم حاجة
ولقيت الراجل ابو دقن بيتشد على البوكس عرفنا من السواق بعد كده انه اتاخد عشان دقنه طويله !!!!! ما علينا
نزلنا وسط البلد حيث الحريم ماشية في الشارع اكنها ماشية في بيتها عادي خالص و الشباب ماشية بقزايز و كانزات البيرة على الكورنيش المهم قضينا يوم ظريف حسيت فيه بمعنى الحرية و الديموقراتية الحكة
و خلص اليوم زي الفل و رجعت البيت و بحاول انسى ….. هو انا قولت حاجة ؟؟؟

الى اللقاء مع الحلقة الثالثة

من طرف **روعة** الخميس مايو 08, 2008 6:25 pm

هههههههههههههههههههههههه

جامدة ياسامة

سوري قصدي مسطول الى الابد

حلوة قوي وضحكتني

تسلم الايادي ياباشا

متتأخرش في الحلقة التالتة

من طرف **USA** الخميس مايو 08, 2008 11:37 pm

اولاُ
ميرسى على مرورك جيولوجيكال

ثانياً
لو كنتى خدتى بالك فى الحلقة الأولى
إن مسطول الى الأبد ده شخصية تانية خالص بيمثل دور سرد القصة

إنما الشخصية الأساسية هو بطل الحلقة الأولى

وان شاء الله الحلقة التالتة لسه مخلصتش ربنا يسهل وأخلصها علطول

ميرسى ليكى كتير

من طرف **روعة** الخميس مايو 08, 2008 11:51 pm

مرسي

انا فاهمة يااسامة ان (مسطول الى الابد ) هو الي بيروي القصة

والبطل هو الي قال:

واعذروني هذه اخر مرة اكتب لكم
فسيتولى هو الكتابة و حق الرد و النشر وربنا يستر

مش هو ده قصدك برضو

ومستنية الحلقة متتأخرش

من طرف **MOoON Light** الجمعة مايو 09, 2008 12:35 am

ههههههههههههههه

جميلة بجد ياايوو اس اييه

بجـــــد ممتعة أوووووى

بس أوعى تقلب لـــــــــــــ!!!! ((سياسة)) بعد الشر يعنى

مستنية بقيت الحلقااات

من طرف **ELLoOoRD** الجمعة مايو 09, 2008 5:11 am

جااااااااااامد ياريس بجد والله

واحنا ف انتظار المزيد

ادينا بس يامعلمى وملكش دعوه انت
اشطه

من طرف **ahmedelamir64** الإثنين مايو 19, 2008 2:55 am

بس الاسطفه جامده يا معلم

مين قضيهالك
ابقي دلني يمكن نبقي زمل في السكه
ههههههههههههههههههههههه
جامده يا مسقط قصدي يا مسطول للابد
بس لزم تكمل
تسلم ايدك يا باشا

من طرف **little angel** الإثنين مايو 26, 2008 3:06 pm

جااااااااااااامدة جدا وبتحكى الواقع المرير

بجد يا يو اس ايه انت المفروض يبنى تكتب ف مجلة او حاجة كدة انت انسان موهوب بجد وسياسى كمان

وهو دة الصح مش حال الشباب اليومين دول اتكل ع الله واحنا متابعيين

بس بكرة لما تشتهر متنساناش