ليه ياصاحبي كده ؟؟

لم أكن في يوم من الأيام لأكتب هذه الكلمات ، ولكن للضرورة أحكام ، فقد كنت دائما أدعوا الناس إلى الحب وأن يعيشوا بالحب ، بالحب وحده لا بغيره ، حتى تكون حياتنا سعيدة ، ولم أكن لأتوقع يوما أن للحب نهايات أليمة كتلك التي قرأت عنها ، أو تلك التي تحدث معي ، أنا لا أعتبرها نهاية ، لأنني لن أنهى علاقة حب حدثت مع أي كائن كان في يوم من الأيام ولكن ! للحب دهشة وحيرة واسئلة غريبة ، لماذا حينما تحب شخصا لأول مرة وربما لا يكون لك به سابق معرفة ، يعني ممكن يكون أنت تعرف شخص وعادي ومش بتحبه وبعدين بسب معاملته ليك تحبه ، وممكن تشوف شخص أنت عمرك ما قعدت معاه وتحبه من أول ما تشوفه وطبعا دا حبه غير اللي قعدت معاه بيختلف طبعا زيادة ونقصا ...
المهم أن الحب عمره ما يتمحي من الوجود ولا من قلب الإنسان حتى ، حتى لو كان الإنسان ده جشع وحقود وخبيث ، حتى لو كان الإنسان ده كاره نفسه لازم يكون عنده في قلبه حب حتى لو مش باين لازم في يوم من الأيام يظهر سواء ظهر من نفسه هو أو حد غيره ... المهم أنه لازم يكون في حب ، وعمر الحب ما ينتهي وعمره ما ها يموت ... يموت الإنسان ويبقى الحب ...
النظرة اللي بتكلم عنها دي مش عارف كل الناس حاسينها وعارفينها ولا لأ .. ولو حاسينها طيب ليه ما بيظهروش الحب لبعض ويعيشوا في أمان وحب .. لأن الحب ها يكون نتيجته الأمان والحياة السعيدة
مش لازم نبأه عايشين نحب الأقارب بس .. لأ .. نحب كل الناس .. القريب والبعيد ..الحلو والوحش
الحلو عشان هو كويس .. والوحش .. عشان نعرفه أن بالحب يعيش الناس أحسن حياة ولازم تكون معانا وتبأه حلو .. طيب لو سيبناه هايتعلم فين ... هانفضل طول عمرنا نشتكي منه ومن أفعاله ، يبأه لازم يجي .. معانا ..ممكن طبعا يتعبنا في الأول شوية ..بس مش مشكلة أحسن ما يتعبنا على طول ...
يا صاحبي لو أنا الإنسان الوحش ده .. أنت ممكن تغيرني .. بس مش ممكن أبدا تخليني أحبك على مزاجك . الحب حاجة مش بأيدي يـاصاحبي ...
- وطبعا أنا بتكلم بصفة عامة ، مش بقصد أن ولد يحب بنت ولا بنت تحب ولد ، لأ .. طبعا .. أنا قصدي اكبر من كده .. في حب ممكن ما تصدقهوش حب ولد لولد زيه .. تلاقيه بيخاف عليه ، ويزعل لزعله ، ويفرح لفرحه .. يتمنى أنه يفديه بعمره ، وماله وكل ما يملك .. حب صادق لله ، مش عايز منه حاجة ، عايز بس يكون إنسان كويس وربنا يسهله حاله ، ويعيش سعيد في حياته ، ويبأه له مكانة كويسة في البلد وبين الناس ، هل في حب بالشكل ده .. طبعا يـاصاحبي في .. بس المشكلة أن أحنا ممكن ما نشفهوش ولانحس بيه إلا بعد ما يضيع ..
ياصاحبي .. إللي بيحب عمره ما بيكره ، لأن الحب والكره زي الليل والنهار عمرهم ما بيجتمعوا أبدا ..
ولو حد قال ممكن أحب وأكره .. يبأه كداب ..
- وبرده لما نتكلم عن الحب لازم نحاول نتكلم بإحساسنا مش بلسانا بس .. لازم الإحساس هو اللي يتكلم وهو اللي يحرك لساني إذا حبينا نتكلم عن الحب ...
ولازم نضحي عشان الحب ... حتى لو التضحية لإنسان ما يستحقش أنك تضحي عشانه ... بس عشان أنت بتحبه لازم تتضحي .. اسأل نفسك أنت مين ... وماتسألش نفسك هو مين ... أنت صاحب الإحساس والشعور فلازم تضحي عشان إحساسك وشعورك ... مش عشان هو مين .. أنت مين !!
يا صاحبي ... أنا برده هافضل أضحي زي ما ضحيت قبل كده مع الناس كلها وبرده ضحكوا عليا ... هاضحي لأني أنا اللي بحب ... وهاعيش عشان المبدأ ده لأخر يوم في حياتي .. الحب هو الحياة يـاصاحبي .
- وبرده لازم اللي يحب يعرف حاجة مهمة أوي أن لما دموعه تنزل على حبيبه ، ويبكي عشان ماشفهوش ، أو يبكي لأي سبب كان .. ويحس في قلبه أنه مشتاق لصاحبه ويتخنق ويدايق أن صاحبه معبروش . ويقوم يدور عليه ويتصل بيه كل شوية ...أوعى تفكر أن ده ضعف ,.. لأ .. عمره ماكان ضعف .. هو ده الحب نفسه هي دي الحياة ، وهو ده الوفاء .. حتى لو اللي بتحبه محسش بيك .. أنت قوي .. قوي في حبك قوي في إخلاصك في وفاءك في كل شيء ...
يا صاحبي .. دموعي بتنزل لوحدها ، وبقوم الصبح من نومي مخنوق ... كنت بقول أذكار الاستيقاظ ، ودلوقتي بقوم من نومي مخنوق وأقول .. ليه يـاصاحبي .... ما إنت عارف أني مبقدرش استغنى عنك !
- وكمان حاجة مهمة ... للحب تنازلات ... إّذا كنت بتحب بجد ... أوعى في يوم صاحبك اللي بيبحك أوي يحس أنك بتفضل حد عليه .. حتى لو بتفضل حد عليه .. ماتحسسوش بكده ... بتبأه دي مصيبة بالنسبة له ، معروف أنك ممكن تحب حد أكتر من التاني ، بس بلاش التاني يعرف كده .. راعي شعوره يعني وده برده كلام بصفة عامة ، يعني لو ولدين بيحبوا بعض .. ويخافوا على مصلحة بعض ، وفيهم واحد بيحب التاني أكتر والتاني مش مهتم غير بحاجات تافهة ، تليفونات وبنات وكلام ع الشات ومصالح دنيوية ، أوعى تحسس صاحبك أنه أخر واحد ... لأني ساعتها ممكن يصدم ... ونفس الموضوع لو بنتين بيحبوا بعض لله !!
يا صاحبي : اللي خسرته في دنيتي أكتر من اللي كسبته .. ومش مستعد أخسر حاجة أبدا تاني في حياتي خسرت حاجات كتير أوي .. بس برده صاحبي أهم من اللي خسرته ، وهو أحب عند من أعز حاجة خسرتها في حياتي .. عادي يـاصاحبي ، مش هاتفرق والله أهم شيء صاحبي ..

-*- عمر الحب ما كان ضعف يـاجماعة ، ولا عمر اللي كتب عنه كان ضعيف .. الحب سماء بتبكي بمطرها على كل الناس .. اللي بيحب المطر واللي مش بيحب المطر .. السماء بتبكي بمطرها عليه غصب عنه
فلازم نكون كده زي السما .. نمطر على الكل .. ونحب الكل .. اللي عايز يتحب واللي مش عايز يتحب هاحبه غصب عنه ومش هاكرهه لأني سماء وسأمطر على الجميع ماء الحب والوفاء والإخلاص . مهما حصل من الناس ..
يا صاحبي : هارجع واسألك نفس السؤال : ليه كده يـاصاحبي ؟!
وأخيرا :
الأخ اللي هو مفكر أن أني كارهه ده وليد اللي هو حمدي يعني زميلكم ده ..
بحب أقوله يـاحمدي أنا عمري ما اتكلمت مع حد كده ، وعمري ما حبيت أزعل حد ، بس مش عارف ليه كده والله .. أنا كنت بتكلم بس من باب الفرفشة ، عادي .. والله
بس ربنا يعلم أني مش بحب أزعلك أبدا ولا عمري ما قصدت أجرحك عن عمد ... أنا بتأسفلك رغم أنك أنت اللي بدأت .. بس سماء الحب تمطر ماءها على الجميع
الرجاء أن تسامحني ، إن كنت زعلت مني في كلمة أو في أي شيء .. لأني عمري ما آذيت حد ..
....
أجعل من نفسك قلبا للحب ينبع بالحنان على الجميع ، حتى يحبك الناس .
محتاج ردودكم عشان أعرف نظرتي صح ولا غلط وصدقوني أنا أول واحد هاطبق ملاحظتكم في ردودكم
مما راق لي ، وأحسست به

تقبلوا تحياتي

أبو معاذ الأنصاري
مظـــــــــلوم

قال المتنبي :
قد كنت أشفق من دمعي علي بصري *** فاليوم كل عزيز بعدكم هانا
وقال آخر وهو يلوم عينه من كثرة البكاء على فقد الحبيب ، يقولها لها إن فقد الحبيب يعتبر قتل لذاتي فكفي أنتي عن البكاء فبكاء يقتلني أيضا وحرام أن جتمع أثنان في قتل واحد يقول :

أعيناي كفا عن فوادي فإنه *** من الظلم سعي اثنين في قتل واحد

لقد عميت عيناي من كثرة البكا *** لفرقة حب أو لتذكار فاقد

تسلم أخي

مازلت أتيقن أن القلوب في أصلها عامرة بالمودة والحب
ولكنها تحتاج إلى من يوقظ فيها هذا الشعور
وما أسماه لو كان حبا في الله
أحبك في الله

ليه ياصاحبي كده ؟؟

ليه ياصاحبي كده ؟؟

رد: ليه ياصاحبي كده ؟؟

رد: ليه ياصاحبي كده ؟؟