اكتر مواقف الاحراج

من طرف **little angel** السبت يناير 19, 2008 12:34 am

انواع الاحراجات اللي تصير لكل احد منا :

1- انك ماشي وواثق من نفسك وفجاة طيح !!!

2- انك تتكلم والي تكلمه رايح فى سابع نومه

3-انك تبين نفسك فاهم ويجيك موقف يبين انك اغبي من الغبي !!!:

4- انك تكون فى سفر وتسال واحد اجنبي سوال ويرد عليك ونت مش فاهم ولا كلمه!!!

5- انك تكون نايم بالمحاضرة واذا با لدكتور يقومك تجاوب ونت مش عارف اصلا المادة بتتكلم عن ايه!!!

6-انك واقف قدام المرايه تضحك وتستهبل ويمر احد ويشوف هبالك!!!

7- انك ترد على واحد وكان بيكلم غيرك ونت تحسبه يكلمك!!!

9- انك تكون فى محل من بره كله زجاج وتمشي وتخبط !!!!

0- انك تشوف ((تظليل زجاج)) وتعدل هدومك وتفتح وحده الشباك وتقول ياقليل الادب

اغلبها للاولاد Laughing

وانتوا بقى ايه اكتر موقف حصلكوا ف كليتنا الجميلة دى؟

من طرف **Crespowbas** السبت يناير 19, 2008 1:09 am

والله يا ليتل
مش فاكر حاجه بالظبط

بس
انا فاكر موقف
هقولك

فى الامتحانت الاخيرة ديه
كان فى امتحان بيتهيقلى فوتو
مش فاكر

بس انا هقولك يعنى ايه اللى حصل
طبعا الامتحان دة كان ثلاث ورقات ماشى
كانت الدكتورة تماضر ليها ورقه فيهم
وكانت هى بتلف يعنى اللى مش فاهم حاجه كدة
وكانت فى ورقه من الثلاثه مكنتش فاهم منها ايه حاجه كانت مكتوبه بخط الايد كدة

كنت بحسب المادة ديه بتاعتها
كانت ماشيه من جنبى وراحت واقفه جنبى
قولت بقى هى هتقف على قله فايدة لا لازم يعنى اظبطها واسالها
روحت مطلع الورقه وبقولها ايه
بتقولى ايه
قولتلها مش فاهم
وروحت مشورلها على اى سؤال
اعدت تضحك والناس كلها اعدو يضحكو
واكتشفت ان الورقه ديه مش بتاعتها

كان شكلى زباله
زباله

ربنا معانا كانت دماغى تعبت بقى سعتها اتاكسدت او وربنا

من طرف **little angel** السبت يناير 19, 2008 1:21 am

ههههههههههههههههههههههههههههههه

بجد شكلك اكيد كان وحش بس حظك ان تماضر عثل وبتعدى عادى عارف لو كانت ميرفت كانت فضحتك

يالا خير

انا بقى اكتر موقف بجد كان واحنا ف اولى الترم التانى ف الدور التالت ف محاضرة الانجليزى يومها كانت الدفعة كلها موجودة وبيولوجى كمان كانوا معانا المهم انا كنت عمالة اتطنتط(بطبيعتى)
ورايحة انزل ف بنط من فوق البنشات لانى مكنتش عارفة امشلى كان المدرج زحمة موت المهم كان ف اخر المدرج شباب كتير جدا وانا عمالة اتنطط وفجأة (لانى طويلة) اتخبط ف الحيطة اللى فوق دى ودوخت ووقعت ف وسط كل الشباب دى المهم انى ببص وافتح عينى ملقيتش ولا بنت وكلهم ولاد ومش عارفين يعملولى ايه لحد مانادو واحدة صحبتى جت قومتنى بس بصراحة عيطت يومها جامد صعبت عليا نفسى قوى وبكيت مش من الوجع لا من الاحراج واقعدت يومها ف المدرج لحد بعد المحاضرة كمان لحد ماكلو مشى يالا بقى الحمد لله ان اليوم دة عدى ولما بفتكره دلوقتى بافطس على روحى من الضحك

من طرف **Crespowbas** السبت يناير 19, 2008 2:03 am

هههههههههههههههههه
يخسارة مكنتش موجود

كنت فوقتك بقلمين ولا اى حاجه

لا والله كنت هتصعبى عليا قوى

خير بقى
الحمد لله
انه عددى على خير

من طرف **ahmedelamir64** السبت يناير 19, 2008 3:16 am

يا بنتي دا الواحد وهو داخل من بوابه

الكليه ده اصلا موقف محرج
احنا اضحك علينا وبيقولولنا اننا في كليه
انتي مش بتشوفي نظره لو انتي جايبه واحده صحبتك الكليه
ده نفسه موقف محرج
بس والله برده بموت في الكليه بتاعتنا دي
بس الحتت اللي انا اعرفها فيها
يعني الدور الارضي
انما بقي محاضرات وساكشن وكده
مجربتش بصراحه الجو ده
تسلم ايدك بجد

من طرف **AHLAWY** السبت يناير 19, 2008 5:25 pm

ههههههههههههههههههههههههههههههههه

نفسى بجد كنت اكون موجود كنت جبت كو مياة وفوقتك بيه ده اخرت التنطييط

انا بقى الموقف اللى كان بايخ اوى هو السنة دايت فى امتحان الشافعى كنت قاعد وراى خالص

علشان اغش ومعايا ورق وقاعد جنب ناس هغش منهم وهو دخل وانا منفض وعمال اتكلم مع ده

ده ودهومرة راح منادى عليا وانتوا عارفين الشافعى وقعد يدينى فى دروس تربية انت اصلا مش

جاى تمتحن ولا همك المادة تعال هنا زاقوله اسف يا دكتور يقولى اصرفها منين

الحمد الله الاموقف عدى على خير كان منظرى زبالة اوى

من طرف **A.S.Shiko0o0o** الأحد يناير 27, 2008 12:08 pm

هههههههههههههه مواقف محرجه الا بتاع الخبطه فى الحيطه ده ههههههههههههههههههه

والله مت على نفسى من الضحك هههههههههههههههههههههه وعلى فكره حصل معايا نفس الموقف بس احنا مش بتأثر من الحجات دى انا ساعتها طبطبت على الحيطه وقولتلها معلش انا اسف

اما بقى بالنسبه للامتحانات كنت فى يوم النبات فى soil&yeast كان فيه مخطط كده الكتور قال هيجى فى الامتحان وطبعا مش حد عرف يحفظه المهم وانا داخل اللجنه لقيت العيال كلها مصغراه

قولت اشمعنا روحت واخد تصغير واحد منهم

ودخلت حطيته فى جيبى المهم الامتحان جه متنيل واضطريت اسفا انى احاول انقله

انا اول ولد فى الدفعه فى بنت قبلى وبعدين انا

المهم وانا مندمج وبنقل فيه مش شايف حاجه صغير اوى يا لهوى

وانا عمال اخد بالشبه لقيت الدكتوره رئيسه الدوروالمعيده د/منى بتاعه معمل الفيزيا طيبه جدا جدا جدا الاتنين واقفين قدامى

يا لهوى الحقونى حد يلحقنى ده فى سرى طبعا

حبه ولقيتهم بيقولوا يلا يا حبيبى سلم ورقتك يا دى النيله مش مشكله مش عاوز اكتب انا حاجه تانى مش هنقله المشكله فى الورقه المتصغره اللى جوى كراسه الاجابه يا لهوى قعدت افكر افكر افكر
ورحت مدخل ورقه الاسئله جوى كراسه الاجابه وبعديه روحت قال يوه معلش احنا بسلم الاجابه بس صح
وروحت شادد الورقه ومعاها الورقه الصغيره متنيه جواها

وساعتها قولت الحمد لله انها عدت على خير

من طرف MeeRoOo الأحد يناير 27, 2008 4:46 pm

ههههههههههههههههههههههههه

مواقف رخمة اوى بجد

انا بقي حصلى موقف في منتهى الاحراج اكتر كمان من الموقف بتاع (little angel)

انا كنت في يوم راجعة من الكليه انا وواحدة صاحبتى وكنا مطبقين اليوم اللى قبلها وراجعين متأخر

على الساعة 8 كدة ومش كنا لاقين عربيات نروح بيها (يعنى من الاخر جايين حالتنا صعبة)

وقررنا قبل ما كل واحدة تروح على بيتها اننا نعدى على واحدة صحبتنا عشان ناخد منها حاجة بدل ما ننزل تانى

وبعدين لسة داخلين الشارع بتاعها (وايه شارع كبير وعلى السريع)

وفجاءة ومش عارفة ازاى لقيت نفسى اتكعبلت في البنطلون اللى انا لبساه وبقيت في الارض

طبعا كنت مخنوقة جدا وكتضايقة موووووت وكمان كنا على الاول الشارع(يعنى اللى ما يشترى يتفرج) وكنت مكسووفة اوى ارفع عينى في وش صاحبتى

ولسة ببص عليها لقيتها جنبى في الارض لحد دلوقتى مش عارفين هى وقعت ليه اصلا

بس بدل الكسوف اللى كنت فيه بصينا لبعض وقعدنا نضحك جااااااااااااااامد

والناس كانت بتتفرج علينا

بجد احنا مش قادرين ننسى الموقف ولا الحراج اللى كنا فيه بسببه بس كل ما نفتكره نقعد نضحك اوى عليه

من طرف **Crespowbas** الأحد يناير 27, 2008 5:24 pm

هههههههههههههههههههههههههههههههه
ما يقع الا الشاطر

من طرف **little angel** الأحد يناير 27, 2008 10:51 pm

ايوة كدة يا حلوين ولعوا المواضيع برددكو وعامة كل مواقف الاحراج اللى بتحصلنا بنفتكرها بعدها على انها ذكرى حلوة ونقعد نضحك جاااااااااامد اول مابنفتكرها

من طرف **A.S.Shiko0o0o** الإثنين يناير 28, 2008 10:04 pm

كل واحد يدخل كده يحط نفسه فى المواقف دى هيقعد يضحك

من طرف زائر الأحد يونيو 22, 2008 10:36 am

مواضيعيك كلها هادفه يا أنجل....
ربنا يديكي علي قد نيتك......
lol!

وأنا حصلي موقف محرج جدااااااا...
كنت ماشي ف الكليه لوحدي
داخل أجيب حاجه من جوه
فكان فيه واحد صحبي واقف ف الطرقه
وأنا مش شايفه...
وأول م بقيت قصاده..
نادي عليه بصوت عالي.....
ببص لقيت بيبسي كانز...مليااااانه
جايه علي وشي...
خبطت الكانز بأيدي...
الكانز طار ف الهوا...بتاع تلاته متر...
ونزل علي هدوم واحده كانت قاعده.....
غررررررررقتها......
ومكنتش عارف أقول أيه؟؟؟؟؟
وخصوصا أن محدش شاف صحبي ده
ومفيش حد قدامها غيري
قمت بصصلها قوي...
أل صعبان عليه اللي هيه فيه...
وبعدين سبتها ومشيت....
love

من طرف **HAMADA** الأحد يونيو 22, 2008 2:19 pm

هههههههههههههههههه

انتو اتبهدلتوا
يا جماعه انا كل ما اقرأ موقف حد اضحك
انا اكتر واحد فى العالم بيتكسف
لو اى موقف حرج بيحصلى تلاقى وشى احمر بدرجه تخلى اللى
بيكسفنى يا يضحك عليه يا يبكى عشانى
ههههههههه
اما عن الموقف
انا عندى يجي مليون موقف
بس انا موقفى قريب من بتاع شيكو كده
انا بكره كلمة ريا ضيات وما بقبلش اى فرع فيها
فكنا فى سنه اولى ومعايه برشام وكان فى دفتر الاجابه
فاذا بالمراقب بيمر عشان يمضينا
والاقيه ادانى الورقتين انا قليل الادبهم ومسك دفتر الاجابه
يالهووووووووووووووووووووووووووووووووووووووووواى
انا بموت يارب الارض تنشق وتبلاعنى انا اتصرفت بطريقه غبيه
جدا كنت خايف لايقلب الورقه
شديتها منه بشكل بس الحمد لله ما لاحظ حاجه عليه
دا موقف بس فيه مواقف تانيه ما تتحكيش انا اتكسف احكيها

من طرف **devotte_h** الأحد يونيو 22, 2008 2:24 pm

موضوع جمييل اوى يا ليتل

انا بقى حصلى حتت موقف ... كنت واقف فى فرح واحد اعرفه ولقيت واحد جاى من بعيد اعرفه شكلا بس وانا واقف مع اصحابى فجاى بيسلم على اللى جنبى وبعدين بيبوصلى اوى كده وانا معرفوش الا شكلا بس المهم مد ايده علشان يسلم فمديت ايدى علشان مينفعش يمد ايده وانا مسلمش

فلاقيته راح يسلم على واحد تانى هههههههههه كان شكلى وحش اوووووووووووى ساعتها لانى المفروض انا مديت ايدى علشان هوه ميتحرجش طلعت انا اللى اتحرجت ومن ساعتها ممدش ايدى اسلم على حد الا لما اتاكد

هههههههه

اللى بيتلسع من الشربه بينفخ فى الزبادى

من طرف **Crespowbas** الأحد يونيو 22, 2008 4:07 pm

اه كنت معاه انا فى الموقف دة

من طرف salmaa الأحد يونيو 22, 2008 4:17 pm

يخرب عقلك يا انجل بجد موضوع تحفه
انا بقي عندي مواقف محرجه متتعدش اصلي ديما متسرعه
وحصلي موقف عمري مهنساه
كنت في ابتدائي وكانت ماما بره البيت
وانا ببص من البلكونه انا واخويا فشوفتها واقفه عند محل الفاكهه اللي في اول الشارع
بسرعه نزلت وجريت في الشارع ورحتلها وقبل اي حاجه قمت مديت ايدي جوه كيس الفاكهه وخدت واحده مش فاكر كانت جايبه أيه وكلتها كنت طفسه خالص
المهم لقيت الست الفكاهنيه بتبص عليه وبتسال ماما انتي تعرفيها؟؟؟والمفاجاه ان ماما قالتلها لأ
فبصيت عليها وديه كانت اول مره اخد بالي منها ايه ده دي مش ماما
ساعتها وشي جاب الوان والست افتكرتني شحاته
فرميت الفاكهه اللي كانت في ايدي وعلي البيت طيرااااااااااان

من طرف **Crespowbas** الأحد يونيو 22, 2008 4:21 pm

هههههههههههههههههههه

يعنى فاكرة الموقف ومش فاكرة الفاكهه جوعتينى يا شيخه

بالهنا والشفا

من طرف **HAMADA** الأحد يونيو 22, 2008 7:45 pm

يالهوى دا منتهى الاحراج
انا حاسس انك لما بتفتكريها بتتكسفى
ههههههههه

من طرف **AHLAWY** السبت يوليو 11, 2009 3:41 pm

قليل الادبم راحت

الله يمسيهما بالخير

طبعا موضوع تحفه
وبيفكرنا بزكريات كومديه في حياتنا

انا بقي عندي موقفين ....

وانا في علوم بنها ..

كان عندنا امتحان جيناتيك بتاع د/ سمير حمدي

الدكتور ده عنب واخر الاجه كان مظبطنا وبيسيبنا نغش واخر حلاوه وعلي مسدات بقي
حاجه كده ...هههههههه

المهم الجيناتيك دي مكناش نعرف فيها الللي حتي

طبعا تصغير وببراشيم

المهم انا يوميها قولت والله منا مصغر انا هدخل بالشيت كله والمذكرات كامله

كانت دفعتنا ولاد وبنات بجد دفعه رجوله كله يغشش كله

المهم بدأنا نمتحن وحاطط مزكرات جمبي وتحتي وقدامي وفي كل مكان تتخيله حتي تحت القميص
اه وربنا

المهم البت المعيده قفشتني اول مره وقالتلي لو سمحت ماتعملشي كده تاني قولتلها حاضر

خدت المذكرات اللي جمبي

بدات في اللي تحتي قفشتني قولتلها هوه مفيش الا انا ولا اييييييييييييييه
وخدتهم

طلعت اللي في القميص طبعا الدفعه كلها في قمه الضحك وهيه نفسها المعيده بتضحك

طبعا خلصت رصيدي من المذكرات والشيتات
لاقيت براشيم الدفعه كلها بتترمي عليا من اليمين من الشمال ومن البنات

واللي تعملي البرشام صاروخ ورق وطيرهولي كان يووووم وربنا كومديا

المهم برده قفلت الماده اليوم ده

الموقف التاني .....

كان يوم امتحان في سنه رابعه اخر السنه
كانت كميا بتاعه عم الشباب منعم فرج والعتيه مصطفي محمود

المهم كالعاده قفلنا بتاعه منعم عشان كان مدينا الامتحان كالعاده
والله يتولي بقي بتاعه العتيه مصطفي

المهم لاقيت زمايلي مبرشمين ماده مصطفي
انا خلصت ماده منعم وقعدت بقي الاعانه الخارجيه تجيلي

اللي جمبي اداني البرشام حطيطه تحتي وقعدت عليه
المهم مع السخونه البرشام لزق في البنطلون من تحت

لاقيت الولا اللي اسمه هشام بتاع الحيوان جي بيقولي حوش البرشام من علي البنطلون
اصله لازق هههههههههههههههه

طبعا الطرقه كلها ميته من الضحك

كان يوم عالمي