بخيت وعديله الجزء الرابع

"يظهر بخيت في مترو أنفاق مكتظ بالركاب وبجانبه زوجته عديله وهي حامل"

عديله تصرخ : وديني عربية الستات يا بخيت شكلي هولد ف المترو .. الواد خلاص بقي علي طرف الفستان .

بخيت "يحاول تشغيل المروحه لكنها تدور بالعكس فتشفط الهواء" :

أنا عايزك تاخدي نفس عميق ف أقرب فرصه يجيلك فيها هوا .

عديله : مش قادره .. دا أنا لو نفضت هدومي الواد هينزل .

بخيت : سمحيني يا عديله ياريت كان معايا فلوس حق تاكسي لغاية المستشفي....

ع الأقل كنا جبنا بيها حاجه كلناها وإحنا ف المترو .

"يظهر بخيت في مستشفي حكومي أما حجرة العمليات"

الطبيب : "يخرج"نسبة الستات اللي بتولد عندنا كل أسبوع أكتر بكتير من نسبة التوزيع قصب السكر ف الحوامديه .

بخيت "في توتر" : هات المفيد يا دكتور بدل مخبطك في قفصك الصدري أخليك تروح تجيب بيه العيش كل يوم الصبح .

الطبيب : جابت ولد .. بس ليه صغير .

بخيت : ربنا بستر ع المصاريف .

الطبيب : العيل اللي بيجي بيجيب معاه رزقه .

" يظهر بخيت أمام مديره في العمل بكافتريا "

المدير : يسعدني أقولك يا بخيت إني لقيت واحد هيشتغل بدالك وبضعف مرتبك كمان .

بخيت : ليه يا فندم!.. دا أنا وفهمي شغالين معاك ف الكافتريا من أيام ما كان فيها كرسي واحد .

المدير : ولا فهمي برده هيكمل معايه .

بخيت : مش مهم فهمي .. بس ع الأقل إنت خالي وأمي موصياك عليه .

المدير :أمك كمان ياريت ما تتصلش بيه .

"يظهر بخيت مع جاره معاطي وفي يده حله غويطه"

بخيت : ما عندكش شوية لبن صغيرين يا معاطي للواد ابني يسد بيهم اي خندق في معدته ؟

معاطي : منعته والله من ساعة ما غلي .. إنت عارف يعني لو كان عندي............

قاطعه بخيت : ماكنتش أتأخرت .. ولا يهمك .

معاطي : لأ كنت عملت رز بلبن.