رحله العذاب اليوميه الي الكليه

من طرف **snow white** الأربعاء يوليو 02, 2008 3:31 am

بســم الله الـرحمــن الرحيــم

جت الاجازة وراحت ايام الكلية مؤقتا بس اكيد لها ذكريات خصوصا الذكريات الرمضانيه ..

بصراحه كل الظروف كانت بتعين الواحد على الصيام والثبات وكان اليوم يبدأ كالتالى

مرحلة المواصلات : لازم نركب عربيه علشان نروح الكليه

طبعا على الصبح تروح الموقف تلاقى واحد ظريف ووسيم وهادى الطباع الا وهو السواق وبمنتهى الرقه والجنتله والذوق يقول

بقولك ايه على الصبح العربيه دى هطلع اربعات ( يعنى كل صف فى العربيه يكون فيه اربعه مع ان الخواجا تيوتا صمم العربيه تشيل

ثلاثه بس ) والى مش عجبه يقف بعيد علشان منزعلش حد على الصبح

طبعا انت مش هتقول غير : اللهم انى صائم......... اللهم انى صائم

تستسلم للامر الواقع وتركب علبة السردين ( قصدى العربيه ) طبعا واسعه وشرحه والبلكونه بتبص على البحر وكل شبابيكها بتبص على

الشارع. جوه العربيه هتحس باحساس غريب وده طبيعى ليه بقه

لان بيكون فيه واحد تقريبا قاعد على رجلك وايدك معديه من ورا كتف الى جنبك ورجليلك لازقه فى بعضها ( ده لو انت الى قاعد على الكرسى وده مش بيحصل كتير )

المهم تتكيف مع الوضع واهى بتمشى والحمد لله ..

تلاقى واحد تانى اوسم من السواق واطيب منه وعلى وجهه تبدو ملامح التقوى والايمان والفطره الطيبه الا وهو التباع طبعا ده الوحيد

الى بيكون قاعد براحته (ما هى الدنيا حظوظ )

شويه كده من بداية الرحله الممتعه وتسمع نداء الواجب

الاجراااااااااااااااااا يا بهوات

ودى المرحله الاصعب فى الرحله الصراحه لانها تتطلب منك عدة مهارات

اولا تركيز عالى جدا علشان تقدر تحدد جيبك كويس وبحركه واحده تدخل صوابعك فى جيبك وتطلع الفلوس

ثانيا مرونه عاليه علشان تقدر ايدك تعدى كل الحواجز فى طريقها لجيبك

ثالثا وده الاهم انك تعمل كل ده فى حركه واحده ومن غير ما تقوم من مكانك لانك لو قمت قابلنى بقه لو قعدت تانى

بعد الاجره والحساب بيحصل حاجه بقه غريبه

لو السواق لقى الوضع هادى وكل شئ تمام والناس قاعده ساكته يزعل ويفكر يعمل ايه

يلجأ للكاست

يفتح الكاست على صوت طالع من شكمان العربيه منتهى الاسفاف والصداع وصوت الكاست مسمع فى العربيه الى ورانا

يقوم واحد غلبان من الناس القاعده ربنا يكرمه ويعزه يقول للسواق لو سمحت هدى صوت الكاست على قدك بس ومش هقولك اقفله

وهنا يكون رد فعل السواق هادى على غير المتوقع يقول بمنتهى الهدوء

انت تريد الحرب ..... اذن فهى الحرب

ويبدأ وابل من القذائف المتتاليه من السواق ويساعده طبعا التباع
تقول برضه انت : انى صائم انى صائم

انتهت الحرب على خير بعد تدخل الجميع
وقربنا نوصل بحمد الله

يأبى السواق ان تمر الرحله بدون ترك ذكرى وانطباع لدى الراكبين فلابد وانت يختم الرحله بحاجه جديده

تفتكرو ممكن يعمل ايه ؟
هسيب ده لخيالكم علشان تشاركوا فى الرحله

ومتنسوش
انك بردو لسه صايم

بس بردو رغم كل ده وحشتني ايام السفر
ووحشتني اوي جامعتي هناك

من طرف **zantout** الأربعاء يوليو 02, 2008 6:06 am

الله يكون ف العون

ممكن السواق يرخم وينزل يجيب شاى او ينزل ينفخ الكوتش اويدخل البنزينة يقعد يسلم ع الشغالين هناك وميمونش ولا حاجة كل الموضوع شوية عطلة اصل الحكاية ناقصه

من طرف **ELLoOoRD** الأربعاء يوليو 02, 2008 4:12 pm

ههههههههههههههههههه

لا حلوه منك والله بس ماكنش لازم الفضيحه دى

على العموم انا اتمنى ان فردة الكوتش تفرقع وكتير بتحصل معايا ههههههههه

تسلمى ع الموصله السريعه

من طرف **zantout** الأربعاء يوليو 02, 2008 4:33 pm

فى احسن من كدة واحد مش واخد باله من صيانة العربية والعربية عطلت يوم امتحان واحنا رايحين الع

ربية راحة الكلية الصبح و كلها مهندسين شطار

المشكلة بقى انى انا الوحيد اللى موجود من قسم ميكانيكا وطبعا كان لازم اشارك بمجهوداتى الجبارة لتصليح العربية

فياريتنى ما تدخلت

وطبعا عينك ما تشوف الا النور

من طرف **tweety** الأربعاء يوليو 02, 2008 7:22 pm

فى حجااااات كتير بتحصل
يعنى مثلا مره واحد كان نازل ع الطريق
وقاااام فاتح الباب بكل قوته
الباب اتكسر ف ايده
نزل طبعااا عمك السواق علشان يتخاااانق الاول وبعد كده قعد يصلح فى الباب

ومره كمااااان بعد اما ركبنا عربيه واستحملنا كل ده طلعت العربيه مش رايحه المكاااان اللى احنا عايزينه اللى هو الكليه ورايحه مكاااان تانى واكتشفنا ده بعد اما فات الوقت وكان يوميها علينا امتحاااان
كان يوم فل بصرااااحه
بس ف الاخر الامتحان اتلغى Very Happy

من طرف **Just Zizo0o0o** الأربعاء يوليو 02, 2008 7:45 pm

لا الموضوع ده بيأثر فيا اوي عاشن انا مهرلاي حجات زي كده بس الفتنره الاخيره الحمد لله ربنا هدانا وبقينا شبه ملاكي حتي اسالو شيكو

المهم انا هقولك علي موقف والله يهلك من الضحك مره كنت راكب في الكنبه الي ورا والسواق قال اربعات فا كنت انا وواحد وصحبي وفيه وحده جنبنا المهم دخل علينا واحد ماشاء الله سبعه في بعض وانا في سري بقول يا منجي من المهالك وقام قاعد جنبي بقينا 15 في الكرسي والراجل راكب فوقي اصلا وانا مش عارف اتنفس خالص وقام زي ما تقولي كده اغم عليا فا نمت

المهم بعد ما صحيت فا ببعت الاجدره للسواق فا قالي هو انت راكب من امتي
اتاريه مكنش شايفني اصلا هههههههههههههههههههه

من طرف MeeRoOo الأربعاء يوليو 02, 2008 8:23 pm

وحشتك ايه يا بنتى

ده انا نفسى تعدى بقي واخلص منها

فات سنتين بس كانو عذاب ولسة فاضل تلاتة

ده انا نفسى اغمض عينى وافتحها يكونو خلصو مش عشان دراسة او كدة

لالالالالالالالالالالالالالالالالالالالالالالالالالا

بالاخص عشان المواصلات

ربنا يعدى الايام دى على خير

من طرف **MOoON Light** الأربعاء يوليو 02, 2008 9:25 pm

جميلة اوووووووى ياسنووو

وفعلااا ايام السفر دى بالرغم من تعبها الا انها والله ممتعه
وجميلة موووووووووت

أقولك على حاجة انا كمان وحشتنى الجامعة هنااك اووووى اووووى اوووى
كانت كل حاجة فيها روووووعة
ونفسى أزورهاا " ازورها بس والله بس اعمل ايه بقى " يلا معلش

مش معنى كده ان الجامعة انهاا مش حلوة
تؤ
كفايا الراحة وكفايا انى اتعرفت على احسن ناس فيها والله

وانتى ياميروو بيتهايقلك انك بعد ماتخلصى الكلية وتسبيهاا هتكونى مستريحة
دا انتى هتشتاقلها جدااا
وربنا يوفقك ياقمر

من طرف **Crespowbas** الأربعاء يوليو 02, 2008 10:59 pm

انا وحشانى بجد بس للاسف مش بمالمراحل ديه انا لو العربيه اللى راكبها اتعطلت
بنزل واجرى 5 دقائق واكون فى الكليه

حظووووووووظ بقى

بس يعنى ممكن السواقين على رئى سعداوى تدخل البنزينه وتنسى اصلا انها كانت راكبه العربيه وممكن تخش تنام جة كمان مع الناس اللى جوة
واللى يزيد ويحط عليك بقى وينقطك انهم لما تستعجلهم

يمسكوك بقى تهزيق وصوت علالى وكلام اونطه من بتعهوم دة ولو مش عاجبك انزل بقى يا شاطر وكافح وكل سنه وانتم طيبين

رمضااااان كريم

من طرف **zantout** الخميس يوليو 03, 2008 6:49 am

بس يعنى ممكن السواقين على رئى سعداوى تدخل البنزينه وتنسى اصلا انها كانت راكبه العربيه وممكن تخش تنام جة كمان مع الناس اللى جوة

ايه يا عم كرسبو سعداوى مين ؟؟؟؟؟؟؟؟؟

من طرف **snow white** الخميس يوليو 03, 2008 7:21 pm

ههههههههههههههههه
ميرسي يا جماعه علي ردودكوا ومروركوا
بس بردوا الايام دي بتكون احلي ايام
انا كل ما افتكر المواقف اللي كانت بتحصلي وانا مسافره
رغم ان في مواقف فيها كانت صعبه اوي وممكن كنت بعيط فيهااا
بس دوقتي لما افتكرهااا بمووووووووت من الضحك عليا

من طرف **Crespowbas** الخميس يوليو 03, 2008 9:51 pm

انا اسف يا ريس

بجد

العتب على النظر

انا اااااااااااااااااااااااااااااااااااااااااسف

معلشى دماغى والله مش معايا خالص

من طرف **ESSS** الخميس يوليو 03, 2008 10:37 pm

هههههههههههههه

موضوع عسول اوي يا سنو

انا الحمد لله مش بسافر اصلا في الدراسة خالص

كليتي على بعد 10 دقايق مشي بالكتير

يعني دلع الدلع بس المشكلة لما اكون مستعجلة شوية او الجو شمس

بركب بس السواقين بقى بيتأخرو على ما يتحركوا وبيتخانقو سوا علطول

يالا خير بس أكيد ارحم من السفر برضه

من طرف **zantout** الجمعة يوليو 04, 2008 2:20 am

عادى يا كرسبو اخوك برضه

هو الناس كلها 5 او 10 دقائق على فكرة احنا كده هنتعب نفسيا اوى

من طرف **AHLAWY** الخميس يناير 07, 2010 7:18 pm

tweety كتب:

فى حجااااات كتير بتحصل
يعنى مثلا مره واحد كان نازل ع الطريق
وقاااام فاتح الباب بكل قوته
الباب اتكسر ف ايده
نزل طبعااا عمك السواق علشان يتخاااانق الاول وبعد كده قعد يصلح فى الباب

ومره كمااااان بعد اما ركبنا عربيه واستحملنا كل ده طلعت العربيه مش رايحه المكاااان اللى احنا عايزينه اللى هو الكليه ورايحه مكاااان تانى واكتشفنا ده بعد اما فات الوقت وكان يوميها علينا امتحاااان
كان يوم فل بصرااااحه
بس ف الاخر الامتحان اتلغى