الطرق علي الحديد

داخل جسم كل واحد فينا فيه جسم تاني أصغر شويه رجلين جوه الرجلين وأدين جوه الأدين ودماغ جوه الدماغ أنسان تاني عايش جوانا بس مش بيظهر في الأشعه
ومرضه وقوته وصحته وضعفه مش بنقدر نقيسهم بأي جهاز لكنه موجود وأسمه نفسنا
وهذا الجانب النفسي بيكون صعب جدا التحكم فيه لأن النفس أمارة بالسوء تميل دائما إلي الأنحراف عن الفطره السليمه وصدقت المقوله الممنوع مرغوب
كل ما هو ممنوع محبب للنفس
كل ما هو سيئ محبب للنفس
كل ما هو محرم محبب للنفس

وتلاقي الأنسان يتولد علي الفطره
يكبر شويه ويتعامل مع المجتمع الفاسد فيبدأ يميل وينحرف عن الفطره ويتجه إلي كل ما هو ممنوع سيئ محرم وبالتالي تجد أن معظم الناس يعيشون حاله من الأحباط
كل حاجه غلط عملها مش ناقص حاجه بس مش مرتاح
ويفكر أيه اللي يريحه
يعمل أيه تاني
وبعدين يقول طب أجرب أني معملش كل الغلط والسيئ والمحرم وأقدر علي نفسي
تلاقي أن ده أصعب شيئ في الدنيا بالنسباله ولا ينبؤك مثل خبير
تلاقي أصيع واحد في العالم اللي ممكن يقتل القتيل ويمشي في جنازته تقابله وتقوله تعالي صلي
تحس أنه وقع عليه جبل ومش قادر يتحرك
أمال قوته فين
مفيش
من هنا تفهم أن القوه مش بالجسم ولا بالعمايل البطاله لأنها أصلا محببه للنفس زي مثلا متيجي تقولي ذاكر أقولك ينهار أبيض مع أختلاف أن دي تدخل من ضمن السيئ والممنوع بس مش محرم والحمد لله علي كل حال
من هنا تبدأ تفهم أن الأنحراف سهل جدا ونفسك والشيطان يساعدوك عليه لكن الصعب
كل الصعوبه في أنك متنحرفش أو تقاوم أنحراف نفسك
نفس الأنسان عامله زي الحديد والأنحرافات اللي بتظهر عليه عشان تتصلح محتاجه شاكوش كبير وتضرب نفسك بكل قوتك مع أحتمال أن مع أول صدمه ليك بعد العمليه ديه العوجه هترجع تظهر تاني فلازم تاخد بالك عشان انت معوج أوي ومحتاج عمليات كتير ومش كل شويه هترجع تبدأ من الصفر تاني

يتهمني الناس اني متفائل إذا قولت ان الدنيا سهلة وكل مشاكلها حلها التوكل علي الله ثم عمل ما يمكنك عمله
وانا في الحقيقة قلقان ومش راضي عن نفسي وأشعر بالضعف الشديد
ربنا كبير ربنا يسامحنا