اذاي هما كانوا كده ؟؟

كانت الساعة 11 بالليل لما ركبنا العربية دي
عربية 14 راكب والسواق عمال ينادي وتعب أوي من كتر المنادية عشان الرجل قليلة في الوقت ده وقفة العيد بالليل متأخر وأخيرا العربية حملت والسواق طلع
أنا كنت جاي من عربية سوزوكي أنا وأتنين معرفهومش وكان عايز يحمل ب5 جنية وأحنا لما عرفنا موافقناش وقولناله لأ هي ب3 جنية زي ما بنركب ونزلنا عشان نركب العربية دي والله أعلم الباقين جايين منين
وبعد ما مشينا شوية بنلم الأجرة ولقيت الناس اللي ورا باعتين الأجرة علي 2 ونص وقالي اللي ورايا أسكت بأه عشان أحنا هنلمها علي كده وبعت الأجرة للسواق
وبعد شوية السواق ساب العربية وساب الطريق ولفلنا وحضن الكرسي وهو بيسأل أنتوا لمين الأجرة علي كام
الناس قلولوا ياسطي احنا علي طول بنركب بكده
قالهم يا جماعة حرام عليكوا وانتوا عارفين أن الأجرة 3 جنيه
قام واحد وقاله بس أنت مقولتش
قال بس أنتوا عارفين والأجرة كده من فترة
قامت واحدة قالتله ربنا يعوض عليك ياسطي
وبعدين قام واحد قال دول مستغلين دول حرمية السواقين وسخن العربية كلها
ساعتها قام واحد والسواق صعبان عليه وقال أحنا بقالنا بندفع 3 جنيه والغلط منش فينا ولا في الراجل ده وأحنا مناكلش في بعض
قام نفس الراجل اللي كان مسخن العربية وهاجمه وسخنها أكتر والناس سخنت وكل واحد كان عنده كلمة قالها
قام السواق وقال طيب أنا بأه الكوبري الأخراني هو محطتي الأخيرة ومش داخل الموقف
والناس مش هاممها ونفس الراجل اللي عمل فيها المناضل الشعبي ضد حاكم العربية السواق المفتري هو اللي كان بيقود المسيرة
وبعد شوية
علي جنب ياسطي
وبعد شوية
علي جنب ياسطي
وبعد شويتين كمان كنا قربا نوصل أنا والراجل المناضل والراجل التاني اللي قال كلمة هو يظنها كلمة الحق وبقيت الناس كانوا نزلوا وروحوا وجت المحطة الأخيرة .. الكوبري
وقال السواق وصلنا
ساعتها فهم الراجل المناضل الساذج أن الناس كانت معاه عشان مصلحتها هي وباعته في أول محطة وقاله وهو بيتلجلج ياسطي انت بتهزر ولا ايه أحنا مش نازلين .. دا أنا لسة هركب مواصلة تانية حرام عليك
قال السواق انتوا تروحوا معايا بأه أحسن ونتعشي مع بعض
ومشي بالعربية هههههههههه
وبعدين وقف بالعربية واستسلمنا للموقف ونزلنا وكل واحد فينا شاف طريقة
مكونتش نستعجل أني أروح ولقيت قهوة وطلبت قهوة وكانت دماغي مشغولة بحاجات كتير وبعد نص ساعة ركبت عشان أروح
وانا ماشي شوفت الراجل اللي كان معايا في العربية واقف بيتكلم مع السواقين والوقت أتأخر وهو مش عارف يروح فين ولا يعمل ايه ؟ دا أكيد هيصرف أكتر بكتير من النص جنيه دا أقل خسارة ليه أنه يصرف أد الأنصاص اللي الناس مدفعوهاش
وافتكرت الناس وأذاي هما أجتمعوا من غير أتفاق ومن غير ميعرفوا بعض أصلا علي أنهم يبأوا كدابين وياخدوا اللي مش حقهم وهما المفروض غلابه يحسوا بالغلبان اللي زيهم واذاي هما كانوا كده ؟؟؟
وهل كل ما أجتمع عليه الناس هو شيئ صحيح مشروع ؟؟؟
وهل صحة الموضوع تقاس بإجتماع الناس عليه
إجتماع الناس مظهر قوي لكنه مش جزء من الموضوع إن كنت تحب أن يكون لك رأي