وحشني المنتدى

من طرف **MeRaMoRe** الأربعاء ديسمبر 12, 2007 12:08 am

السلام عليكم ورحمة الله وبركاته

ازيكم جميعا وعاملين ايه في الإمتحانات يارب كلنا نحل كويس ونعدي السنه دي على خير

الموضوع اللي انا هكتبه ده ( نداء مني لأعضاء المنتدى )

انا ملاحظه بركود وروتييييييييييين ممل اوي في المنتدى وملاحظه غياب ناس كتير كانوا موقفين المنتدى وعاملين له حس ومخليين في نشاط دائم فيه ماحدش يقول امتحانات ولا مشغولين , لأن الحكايه دي من قبل الإمتحانات

والموضوع ماوقفش على كده وبس لاء, صحيح في ناس بتكتب مواضيع في كل الأقسام ومعدل الكتابات ده بيوصل احيانا لسبع او 9 مواضيع في القسم الواحد في يوم واحد لنفس المجموعه من الناس صحيح هم يشكروا على مجهودهم ده بس للأسف في سلبيه من ورا الاسلوب ده :

المواضيع 90% منها مكرر وبشوفها في حوالي 7 منتديات عالأقل

في مواضيع متكرره كتييييييير والمشرفين مش بياخدو بالهم من النقطه دي , لدرجة ان نقل المواضيع من منتديات تانيه بيبقى copy & paste بنفس الأخطاء الإملائيه وبنفس الاسلوب اللي اتكتب بيه قبل كده لاء ولو الموضوع منقول من منتدى خليجي او مش مصري تلاقي الكلام مكتوب بنفس اللهجه

يعني حتى مافيش مجهود فردي من اللي بينقل في انه يغير من الإسلوب او يخليه بنفس اللهجه عالأقل او حتى يصحح الأخطاء الاملائيه ( ده معناه ايه ) ؟؟ ان اللي بيكتب مش بيقرا لاء ده بيحط الموضوع وخلاص

الإهتمام بالكم وليس الكيف للأسف الشديد

السلبيه التانيه من كترة المواضيع من نفس العضو بتخلي الواحد مايقراش كل مواضيعه وللأسف بيجي على حساب ناس تانيه تكون كاتبه موضوع وتعبانه فيه وتيجي في اليوم اللي بعده او بعد ساعات من كتابة الموضوع وتلاقي ان موضوعها نزل لأخر القسم ومافيش ردود يعني حتى اللي دخل ورص مواضيعه ماكلفش نفسه انه يرد عاللي تعب في كتابة موضوعه

للأسف كمان ان مجموعه محدده من الناس بتدخل وترد على نفسها متجاهله تماما وجود اعضاء تانيين كأنهم في المنتدى لوحدهم , احنا هنا ياجماعه اسره واحده بندعم بعض وبنشوف افكار بعض اغلبنا يعرف بعض من الكليه وفي ناس مش عارفين بعض فالمنتدى ده بيجمعنا احنا مش هندخل نشجع ولا نعمل احزاب وفرق وكل فرقه تحاول تبقى الأحسن , احنا هنا بمجهودنا الفردي عشان نقرب من بعض ونفيد ونستفيد

انا بقى مش عارفه فين الناس اللي احب اسميهم ( اعمدة المنتدى ) لأنهم فعلا اساس المنتدى

فين ابداعات منى زكي ورومانسية موون لايت و دبلوماسية رنيم وعقل سنو وايت ونقاشات اس وقصص ديبو وحضور سايكو وتميز زيزو واراء شيكو وعذوبة نونا وتنوع توتي والعاب وخفة دم قشطه ( اين انت ياقشطه ) ؟؟!!

انتوا فين ياجماعه ؟ والله المنتدى وحش من غيركم ...

فين مواضيعكم الجميله اللي كنا بنستناها والله انا مش بجامل بس فعلا كل واحد فيكم له حاجه بتميزه وبيضيف تميز للمنتدى ده يعني ماينفعش نستغنى عنها

ياريت ترجعوا تاني وتوقفوا المنتدى مع الناس الجديده اللي نورته وندعم بعض ونخلي المنتدى ده متميز بوجودنا كلنا

واتمنى يبقى فيه ابداع وكل واحد يحاول يكتب موضوع من تأليفه حتى لو كان مجرد رأي او وجهة نظر او فكره حابب يعرضها

مش عيب ان الواحد ينقل موضوع بس لازم يكون واخد باله هو بينقل ايه ولمين لأن مش هو الوحيد اللي بيدخل منتديات تانيه وبيشوف المواضيع فياريت الموضوع المنقول يكون جدير بالتميز

انا اتمنى ان المواضيع بعد كده تتنقل من منتدانا يعني تخيل لو انت كاتب موضوع هنا وحد تاني دخل المنتدى ونقل موضوعك بجد هتحس انك متميز فعلا

وارجو ان الناس ترد على بعض لأن ده بيدي ثقه للكاتب وتخليه يبدع اكتر وتشجعه انه يكتب

اسفه اني طولت بس فعلا انا زعلت عاللي شوفته وعالحاله اللي المنتدى بقى فيها

اتمنى ان ندائي يكون وصل واسمع صداه منكم وارجو ان تعودوا قريبا

مع خالص تحياتي

اختكم MeRaMoRe

من طرف **Crespowbas** الأربعاء ديسمبر 12, 2007 5:35 pm

بصى يا مراميرو انتى عندك حق فى كل اللى قولتيه

بس قوليلى انتى بتدخلى كام مرة فى اليوم
طب كام مرة فى الاسبوع
وبتعملى ايه
بتردى
فيها ايه لما تلاقى انتى حاجه متكررة وتبلغى الناس انها متكرر مدام انتى بتقولى كلنا واحد هنا
كمان فى حاجه
انتى بتقولى فى ناس على المنتدى كانه لوحدهم
وبعدين تقولى منى زكى ورنيم والناس ديه ما بتدخلشى ليه
هما علشان الناس ديه ما بتدخلشى يبقى احنا ما ندخلشى ولا ايه رايك
ما احطتش مواضيع جديدة علشان المواضيع القديمه تتنها زى مهى وما يبقاش فى جديد
ولا انتى ايه رايك؟
ثانى حاجه
مش الناس اللى انتى بتقولى عليها ديه ما بتدخلشى اصحابك
ليه ما بتروحيش تكلميهم وتقوللهم الكلام دة
فكرى هما هيقرو موضوعك ازاى وهما اصلا ما بيدخلوش
ولا هيشمو عل ضهر اديهم مش عارف بقى انتى تقصدى ايه بالظبط
اصل موضوع دة مش هيقراه غير اللى انتى بتقولى عليهم محتلين المنتدى وكانهم فيه لوحدهم
برضو مش فاهم انتى تقصدى ايه؟
عوزانا يعنى ما نكتبش ولا نحط مواضيع علشان المواضيع الحلوة بتاعت زمان تتنها زى ما هى ويبقى المنتدى عليه نفس المواضيع وما تتغيرشى
وبعدين انتى بتتكلمى فى ان واحد بيحط الموضوع كما هو فى المنتديات الثانيه
قدرى الموضوع دة عاجبه وحس انه مستفيد منه ما يحطهوش (اه انا معاكى انه
لازم يبقى فى جديد من ابداعه )لكن برض و ما يمنعشى انه يحطه
علشان هو عاجبه

على العموم انا بشكرك لهتمامك بمصلحه المنتدى
ولو انتى بتحبى المنتدى وحاسه انا بيجمعنا كلنا وبيخلينا نستفيد من بعض
خلى الناس ديه ترجع علشان المنتدى يرجع ى زمان ويبقى لينا كلنا
حتى لو مش هيدخلو كتير
بس يعملو حاجه يحسسونا بوجودهم معانا

وبشكر تانى على تعبك

من طرف **mido19** الخميس ديسمبر 13, 2007 12:41 am

زى كرسبو ماقال

من طرف **DeBo0o** الخميس ديسمبر 13, 2007 2:21 am

شكرا بجد على اللفته الجميله دى يا ميرا .. وانا بضم صوتى لصوتك

لانى بجد مضايق جدا . كان فى حاله من الالفه و الود و التالف ما بين الاعضاء

بدات احس بفتور فى الردود و فى طرح و نقاش المواضيع .. سؤال يطرح نفسه

احنا ليه مش زى الاول ؟؟ ..بس طبعا كل الاسباب اللى قالتها ميرا فيها جزء كبير من الاسباب اللى ادت

الى الركود دة فى المنتدى ... و بجد انا عايز اسلط الضوء على بعض النقاط الى طرحتها ميرا

زى كثره طرح المواضيع فى اليوم الواحد و بصفه دوريه و عدم الرد الا على مواضيع اشخاص معينه

و كمان الاهتمام باقسام معينه و اهمال الاقسام الاخرى .. و انتشار المواضيع المنقوله و عدم تفاعل الاعضاء

فى نقاشها .. كنا فى الاول الموضوع بيبقى وراه قضيه او حاجة بناقشها كلنا .. او دعابه بترسم الابتسامه

على وجوه الاعضاء .. و كان فى حب و ترابط .. بدا يحصل العكس و التفكك بدا يظهر و بجد انا حزين

و نفسى المنتدى يرجه زى الاول و احسن و خصوصا ان احنا انضم لينا اعضاء بجد بيقدمو كل ماهو مميز

و رائع و اعتقد ان الجروب كله لو تجمع تانى .. فا احنا بجد هنرتقى بمستوى المنتدى دة و هيبقى

اجمل و احلى منتدى فى الدنيا

يا ريت نعملها حمله تنشيط و نبدا خطوه خطوه مع بعض .. احنا مش طالبين منك اكتر من نص ساعه يوميا

تصفح فيها منتداك الجميل .. و قدم فيها راى او شارك بفكرة او حتى بدعابه شفافه ترسم على وجوهنا

كلنا احلى ابتسامه فى الدنيا

و اسف لو كنت طولت عليكم .. وفقنا الله لما فيه الصالح

شكرا بجد يا ميرا مور على الروح الجميله اللى ظهرت مدى حبك للمنتدى و لاصحابك على المنتدى

من طرف **ESSS** الخميس ديسمبر 13, 2007 10:04 pm

أنا معاكي فعلا يا ميرووووو

وبجد بجد I'm sooo sory

والله الموضوع ده غصب عننا أكيد

وأنتي عارفة اننا اد ايه بنحب المنتدى

وعايزينه يبقى أحلى وأهم وأفيد منتدى فعلا

بس انتي عارفة الامتحانات والبلاوي اللي احنا فيها

غير ان (هتكلم عن نفسي) أنا مكنتش في المود خااااالص الأيام اللي فاتت

وبصراحة مكنتش حاسة اني اقدر أدخل المنتدى أفيد وأستفيد واتفاعل معاه

سوري مرة تانية على الغياب ده

وإن شاء الله أكيد أكيد بعد الامتحانات هيرجع المنتدى تاني أحسن من الأول

وان كان عليا هحاول بقدر الامكان اتواجد واعمل حاجة

بس يارب ابقى خفيفة على المنتدى

سوري يا جماعة طولت عليكو
والسلام ختاااااام

من طرف **Just Zizo0o0o** الجمعة ديسمبر 14, 2007 1:54 am

ميراموووووور بجد دا اروع موضوع انا شوفتو من يوم ما فتحنا المنتدي ده بصراحه اول مره احس ان المنتدي مهم عند الناس كده بجد زي ما ديبو قال المنتدي فقد روح الاسره الي كنا فيها وكمان الي انا ملاحظو ان الناس بتعمل مواضيع بالهبل طبعا يشكرو علي كل دقيقه بيتعبوها في المنتدي بس الفكره والله بالكيف زي ما اتقال ميرا بجد انتي اروع واجمل بنوته بجد انتي بالتوبيك ده هتوقفي المنتدي تاني علي رجليه انا عارف ان معظم الناس مش بتدخل عشان الامتحانات وده حقهم بس ان شاء الله بعد الامتحانات هنفتح المنتدي الجديد حاجه اعلي واحلي وان شاء الله كل واحد هيبقي بلونو ويحاول ينقل من مواضيعو علي اد ما يقدر وترجع الحياه والروح تاني للمنتدي بالناس الجديده الي دخلت معانا ويارب يارب يارب الموضوع بتاعك ده يبان رد فعلو بسرعه اسف اذا كنت طولت عليكم بس بجد الموضوع يشد ويخلي الناس تبدأ تتحرك عشان كل الي احنا عملناه والي المنتدي وصلو ممكن يروح في لحظه لو الناس مش اخدت بالها

شكرا ميرامور علي اللافته دي وبجد انا مش عارف اشكرك ازاي

والناس الي عندها امتحانات الناس ايه دا تقريبا نص المنتدي ربنا معانا ويوفقنا جميعا والي عاوز يجيب تقدير يجيب والي عاوز ينجح ينجح قولو امييييييين

من طرف **MeRaMoRe** الجمعة ديسمبر 14, 2007 2:24 am

اولا احب اشكر كل اللي دخلوا وردوا

ثانيا

بس قوليلى انتى بتدخلى كام مرة فى اليوم
طب كام مرة فى الاسبوع
وبتعملى ايه
بتردى

انا صحيح مش بدخل كتير والكلام موجه ليه زي ماهو موجه للمنتدى ولما بدخل اه بقرا المواضيع الجديده وبحاول ارد على اد ما اقدر ولما بيقابلني موضوع كويس وعجبني بعرضه ( وبعدين اعتقد ان حتى لو كنت برد بس دي في حد ذاتها مشاركه مني وتفاعل كفايه انها بتخلي اللي كتب الموضوع يحس ان في حد متابع )

انتى بتقولى فى ناس على المنتدى كانه لوحدهم
وبعدين تقولى منى زكى ورنيم والناس ديه ما بتدخلشى ليه
هما علشان الناس ديه ما بتدخلشى يبقى احنا ما ندخلشى ولا ايه رايك
ما احطتش مواضيع جديدة علشان المواضيع القديمه تتنها زى مهى وما يبقاش فى جديد
ولا انتى ايه رايك؟

رأيي انك تدخل عادي جدا وتحط مواضيع جديده بردو عادي جدا بس مثلا موضوعين او بالكتير تلاته مش عشان المواضيع القديمه تفضل لاء عشان الواحد عالأقل يلحق يشوف كل المواضيع الجديده في كل قسم عشان مش كلنا عندنا وقت اننا ندخل ونشوف كل الأقسام وكل المواضيع وده السبب اللي بيخلي في اقسام فاضيه ومافهاش تفاعل يعني المفروض يبقى فيه نسبه وتناسب يعني وسط لأن كل شيء بيزيد عن حده بينقلب ضده

الناس اللى انتى بتقولى عليها ديه ما بتدخلشى اصحابك
ليه ما بتروحيش تكلميهم وتقوللهم الكلام دة
فكرى هما هيقرو موضوعك ازاى وهما اصلا ما بيدخلوش
ولا هيشمو عل ضهر اديهم مش عارف بقى انتى تقصدى ايه بالظبط
اصل موضوع دة مش هيقراه غير اللى انتى بتقولى عليهم محتلين المنتدى وكانهم فيه لوحدهم
برضو مش فاهم انتى تقصدى ايه؟

هم اه معايا في الكليه واصحابي على فكره احنا مش بنتكلم كتير عالمنتدى واحنا مع بعض وانا كتبت الموضوع ده وقلت الكلام ده عشان لما يدخلوا يقروه ويشوفوه انا لو هقولهم بره او هعلق على السلبيات معاهم بره المنتدى يبقى مافيش داعي بقى للمنتدى من اساسه وكل واحد يجيب موضوع ويوريه لأصحابه في الكليه وخلاص على كده احنا هنا كلنا اخوات واصحاب بغض النظر عن الكليه وكلنا سواسيه

وانا بعاتب الكل الكلام مش موجه لفئه محدده ولو حد حاسس ان في تقصير منه او شايف ان كلامي ده صح يحاول يصلح ويعمل الأفضل

اما بخصوص التكرار فأنا بقول اننا نحاول نقلل منه مش نلغيه او يبقى فيه عالأقل اضافات فرديه او تعديل من اللي نقله

هو ده كل اللي اقصده

زي كرسبو ماقال

شكرا على ردك ياميدو وعلى تعبك في التعليق

شكرا على مرورك ياديبو انت واس واتمنى فعلا المنتدى يرجع زي الأول واحسن ومبسوطه ان ديبو فهمني صح وفهم اللي اقصده كويس

واتمنى ان اس ترجع وتشاركنا تاني بمواضيعها وارائها

واخيرا شكرا ياكرسبو ليك على مرورك وانت واحد من اللي بسميهم اعمدة المنتدى بس ماذكرتش اسمك فوق لأنك مش محتاج نداء واتمنى تفضل منور المنتدى بوجودك دايما

تحياتي...

من طرف **MeRaMoRe** الجمعة ديسمبر 14, 2007 2:32 am

زيزو بجد بجد مش عارفه ارد واقولك ايه دي شهاده اعتز بيها ومبسوطه ان الموضوع عجبك انا كتبته لأني فعلا بحب المنتدى وببقى مبسوطه لما بدخله وبنشارك كلنا وبحب كل الناس اللي فيه واتمنى زيك انه يرجع تاني ويبقى احسن من الأول وربنا يوفقنا جميعا ونعمل حفله كبييييييييييره هنا بمناسبة نجاحنا كلنا

من طرف **MOoON Light** الجمعة ديسمبر 14, 2007 3:55 am

ان شاء الله ياميرووو نرجع تانى زى الاول واحسن كمان
بس طبعا ده اكيد زى مااس قالت
ممكن يكون شوية مشغوليات بس الامتحانات
ربنا يوفقنا جميعاااااااا

من طرف **silent** الإثنين ديسمبر 17, 2007 10:22 pm

ياريت يا ميرو ندائك يوصل لكل الغايبين

ويرجعوا ينوروا المنتدى تاني

من طرف **snow white** السبت ديسمبر 22, 2007 9:25 pm

واااااااااااااااااااااااااااااااااااااااااااااااااااااااااااو

هايل يا ميروووووووووووووووووووو
بجد انتي احلي بنوته في المنتدي
بجد مش عشان صحبتي
بس انتي اكتر حد قال اللي كان نفسي اوصله
وميرسي لاهتمامك وخوفك علي المنتدي
واسفين علي غيابنا بس والله مش بأدينا
ادعيلنا زي ما بندعيلك
وبجد والله وحشتوووووووووووووني
وعندك حق في كل كلمه كتبتيها
وانا ليا عتاب بسيط علي بعض الاعضاء ياريت يقبلوه لو احنا فعلا اخوات
تكرار المواضيع ده المفروض ان المشرفين يعملوا للموضوع المكرر حذف
دي شغلتهم ولا مشرفين علي الفاضي؟
يعني عيب اوي لما حد يكون مشرف وبدل ما يحذف توبيك متكرر نلاقيه هو اللي كاتب توبيك مكرر
وكمام انا دخلت لقيت كميه توبيكات مهوله ومش حد رادد عليها
ماهو فعلا مين هيلحق يرد علي كل التوبيكات دي وخصوصا اني لقيت تواريخها في يوم واحد او قريبه اوي من بعض والمشكله انها ممكن تكون من شخص واحد
ياريت يا جماعه نراعي ان الناس مش عندها وقت دوقتي زي الاول
بلاش نخلي المنتدي ممل
اسفه اني طولت وبجد وحشتووووووووووووووووووووووووووووووووووووووووووني