مدونة يوسف وسلمي

من طرف yusuf الأحد فبراير 01, 2009 4:29 am

بدون مقدامات كده ولا اي حاجه أنا يوسف صاحبكم الجديد ويارب أكون صاحب كويس

فكرة المدونات ديه بهرتني جدا وحبيت أعمل هنا حاجه زيها وهي ببساطه أن أنا وسلمي حبيبتي هندون كل اللي بنمر بيه ف حياتنا عشان بعد كده لما نكبر تفضل المدونه ديه ذكري حلوه لينا دا بغض النظر عن أننا هنكمل مع بعض ولا لأ بأختصار هنعيش شويه ونشوف الدنيا هتوصلنا لفين وأكيد مش هنندم علي صراحتنا قدام نفسنا وقدامكوا
وطبعا أنتوا أصحابنا يعني ممكن تقولوا رأيكوا ف اللي أحنا بنكتبه
الفكره مش جديده أوي بس عشان تبأه زي م أحنا عايزين لازم نفكر شويه
أكيد حد هيقول متفكر وبعدين أكتب بس أنا حولت فعلا أعمل كده بس مش عارف مع أن فيه ف دماغي تصورات كتير للمدونه وحاسس اني أقدر أكتب ففكرت أنا وسلمي أننا نورط نفسنا ونشوف هنقدر ننفذ اللي بنفكر فيه ولا لأ وزي م تيجي بأه

من طرف السندباد الأحد فبراير 01, 2009 4:33 am

ربنا معاكو..بس تقولوا كل حاجه وبصراحه ههههههههههههه..ويارب يوفقكم وتستمروا مع بعض..وعلى قد ما تقدروا بلاش فضايح ههههههههه..شكرا ليكم ويارب يوفقكم مرة تانيه مدونة يوسف وسلمي 343361

من طرف **Crespowbas** الأحد فبراير 01, 2009 12:55 pm

وانا معاك يا ريس

سامعك اهو

بس متركنيش كتير

من طرف **MARYEM** الأحد فبراير 01, 2009 4:08 pm

ربنا يوفقكم ويكملكم على خير ومستنين نعرف كل حااااااااااااااجة يلا مش تسبونا نستنى كتيييييييير انتوا عارفين الفضول بقى

من طرف **RANEEM** الأحد فبراير 01, 2009 5:39 pm

وانا كمان مشتاقه اسمع قصتكم
ربنا يوفقكم
ويسعدكم

من طرف **A.S.Shiko0o0o** الأحد فبراير 01, 2009 9:48 pm

ها يا عم

حبيتوا بعض ازاى

قول قول

من طرف yusuf الإثنين فبراير 02, 2009 12:29 am

أنا صعت كتير وأتهيألي أني حبيت بنات كتير وأتضحك عليه كتير أوي بس مكنش فيه حاجه بتفرق معايا حتي لما كنت أتعلق ببنت أوي وبعدين كل واحد يروح لحاله بزعل شويه وبعدين بعرف أن ده مش الحب اللي كل الناس بتتكلم عنه كان أهم حاجه عندي أني أنفذ رغبتي بس أنا عايز كده يبأه كده أنا عايز أعرف ديه يبأه لازم أعرفها وأحبها كمان لحد معرفت أنا أيه أنا هوائي جدا بتشد لأي حد بسرعه ولما فكرت كويس ف تصرفاتي كلها لقيت أني ف حاجات كتير كده هوائي ومش مستقر مش قاصدي أستقرار عاطفي وحب وأرتباط والكلام ده أنا أقصد مش مستقر مع نفسي يعني شويه فرحان وفثانيه بقلب ببأه حد تاني...وعشت مع نفسي شويه كتير لحد م خلاص حسيت أني هتجنن وخصوصا أن كان فيه فراغ كبير أوي ف الوقت ده وملل ومليش نفس أعمل أي حاجه...ومقدرش أخبي عليكوا لأني قولت أني هتكلم بصراحه أنا روحت لطبيب نفسي أكيد طبعا أول حاجه هتيجي ف دماغكوا دلوقتي أن أنا مجنون..صعب أوي أنك تروح عيادة طبيب نفسي بمزاجك إنشله حتي مره واحده أنا روحت شهرين كانوا أحلي شهرين ف حياتي...

هناك قابلت سلمي..

من طرف **RANEEM** الإثنين فبراير 02, 2009 12:43 am

كبر القصه شويه
عشان انت بتكتب حبه صغيرين
كمل

من طرف **Crespowbas** الإثنين فبراير 02, 2009 1:30 am

تمام ياريس
انا متبعك

من طرف salmaa الإثنين فبراير 02, 2009 7:28 pm

أنت بعدت عن الفكره أوي يا يوسف
كان المفروض أننا نتكلم عن اللي بيحصل حولينا مش عن نفسنا
بس كمل أحلي قصه ف حياتنا
أنا ويوسف أتعرفنا علي بعض ف عيادة الدكتور عاصم وهناك عشانا قصه رومانسيه جدا مش هقدر أكتب عنها بس أنا متابعه
وشكرا ليكوا كلكوا يا أصحابي علي أستقبالكوا لينا
وممكن تعتبروا القصه ديه هي أول تعارف لينا مع بعض
وبعدين نكمل المدونه اللي المفروض أننا بنتكلم فيها عن مشاكلنا
فكرة المدونه يه فكره جميله جدا وهي عباره عن صحافه شعبيه بنتكلم فيها عن أي حاجه بتحصلنا
بس مش مشكله دلوقتي
نكمل القصه بتاعتي أنا ويوسف الأول وبعدين نبدأ
أسلوبك حلو أوي يا يوسف وكان الشهرين دول أحلي شهرين عندي أنا كمان بس اللي جاي أكيد أحلي
بس عايزه أقولك متهولش ف القصه وتكبرها زياده عن اللزوم وتحط أحداث من خيالك مش عايزين نكون مزورين وخد بالك أنا متابعاك

من طرف **MARYEM** الإثنين فبراير 02, 2009 7:36 pm

كمل يايوسف مستنين باقى قصتكم

من طرف yusuf الإثنين فبراير 02, 2009 7:39 pm

إن شاء الله يا مريم
وياريت تخليكوا كلكوا معايا ومتزهقوش
سلمي
خليكي معايا عشان تعرفي أنا بحبك أد أيه

من طرف **Just Zizo0o0o** الإثنين فبراير 02, 2009 11:06 pm

جميل جدااا

اولا انا برحب بيكو جدا جدا جدا واتمني انكم تبقم مبسوطين هنا وسطنا وواثق انكم هتحسو باختلاف هنا وسط الناس دي احلي ناس واحلي اصحاب قبلتهم

ثانيا فكره جامده اوي يا يوسف والاجمل منها هي جرأتكم وصراحتكم وحبكم الي عاوزين الدنيا كلها تسمع عنو

ربنا يوفقكم مع بعض وتكملو حكايتكم علي خير ونحضر فرحكم كمان ولا انت مش هتعزمنا ؟

متابع

من طرف **Crespowbas** الإثنين فبراير 02, 2009 11:29 pm

ربنا يوفقكم ويوفق الجميع ويوفقنا

من طرف **Just Zizo0o0o** الإثنين فبراير 02, 2009 11:44 pm

ههههههههههههههه

يارب يا عم يوفقك واشوفك عريس اد الدنيا

ويكرمني الاقي الي بدور عليه

من طرف yusuf الثلاثاء فبراير 03, 2009 12:30 am

أنا متشكر جدا لردودكوا ويارب كل واحد يحقق حلمه

المهم أتصلت بدكتور عاصم وحددت معاه معاد وكنت موجود ف العياده الساعه 9 بالليل..كان فيه حاله جوه والممرضه طلبت مني أستني شويه لحد م الحاله اللي جوه تخرج..مكنش فيه حد موجود..هي عيادة الطبيب النفسي كده كل واحد له معاد بيجي فيه…وبعد ربع ساعه لقيت دكتور عاصم بيفتح الباب وشوفت سلمي خارجه من عنده…أول م شوفت سلمي عنيه منزلتش من عليها وهي كمان بصتلي أوي حسيت أنها تعرفني…

سلمي أشيك بنت ف الدنيا..وأجمل بنت شفتها ف حياتي كلها…

مشيت بس فيه حاجه خدتها معاها..تقريبا أنا معجب بيها ولازم أعرف عليها...

دخلت أوضة الدكتور عاصم وشغل الريكوردر وفضلنا نتكلم كتير..كلمته عن كل العلاقات اللي مريت بيها ف حياتي...وحكتله كمان عن علاقة حب كبيره أوي كانت بيني وبين بنت زميلتي أيام الكليه وأذاي أنتهت العلاقه ديه وأذاي أنا عشت بعد كده مش لاقي حب حقيقي…

بس هو كان له وجهة نظر ف كده..قالي ممكن لو كانت علاقة الحب الكبيره اللي بتتكلم عنها ديه تمت..كان ممكن تمل برده وتسيبها وتعرف غيرها زي محصلك بعد كده مع كل اللي عرفتهم…

كلامه أقنعني أوي…مش عارف ليه كنت بفكر ف سلمي البنت اللي لسه شايفها من ساعه هنا…كانت صورتها بتظهر قدامي كتير وكنت حاسس أن حبي القديم بيرجع يظهر تاني…بس المراي بشكل مختلف..أتهيألي وقتها أن سلمي هي الحد اللي بدور عليه...

سألت الدكتور عاصم عنها..بس هو مردش عليه بس قالي كلمتين عن شرف المهنه وأن ميصحش أنه يخرج أي معلومات عن الحلات اللي بيعالجها...أحرجني....بس أنا ف اليوم ده أرتحت أوي أني أتكلمت معاه...أو أرتحت عشان أتكلمت وخلاص...

هو قالي أني مش مريض بالصوره اللي أنا فاكرها بس أنا مريض نفسي زي كل الناس اللي ف الدنيا مهما مرضي نفسيين...وحددلي معاد تاني يوم الأتنين الساعه 9 برده...

وف المعاد كنت موجود ف العياده .وأتفاجئت بحاجه...سلمي موجوده ف أوضة الأنتظار...والممرضه برده أعتذرتلي وطلبت مني أني أستني شويه علي م الدكتور يخلص الحاله اللي عنده وبعدين ممكن يحددلك معاد تاني...كانت ديه فرصه كويسه أوي عشان أتكلم مع البنت اللي أنا معجب بيها جدا واللي من ساعة م شفتها وكل حاجه متغيره عندي...

كانت قاعده وباين عليها سرحانه ف حاجه...كنت عايز أتعرف عليها...بس كنت متردد جدا خايف تطلع مجنونه وتعملي فضيحه...بس بعد خمس دقايق ببصلها وهي سرحانه أوي ومش شايفاني أبتديت أتكلم...

يوسف: لو سمحتي يا فندم...

ألتفتت نحيتي بسرعه..حسيت أنها مكنتش واخده بالها خالص أن فيه حد موجود معاها..

سلمي: أيوه...

يوسف:هو معاد حضرتك دلوقتي...

سلمي:أيوه...

يوسف:أنا كمان عندي معاد دلوقتي مع الدكتور...

سلمي:أذاي يعني؟؟؟

كانت بتكلمني بألاطه وعصبيه...بس كان صوتها حلو أوي وكمان مكنتش لابسه دبله ف أيدها...وده اللي شجعني أني أفتح أي موضوع أتكلم فيه معاها...

يوسف:أنا معادي مع الدكتور دلوقتي...

سلمي:يبأه أكيد هيقولك علي معاد تاني...

يوسف:متهألي قابلت حضرتك قبل كده..

سكتت شويه كأنها بتفتكر وبعدين قالت:أنا أول مره أشوفك...

ورجعت سرحت تاني..نفسي أعرف هي سرحانه ف أيه..أو أيه اللي مخايها متضايقه أوي كده..كان باين عليها..

يوسف:دي تاني مره أجي فيها هنا...

سلمي:أيوه

يوسف:مفيش حد يعرف خالص أني مريض نفسي..خايف أقول لحد يقول عليه مجنون...أنتي عارفه نظرة الناس المتخلفه للمرضي النفسي علي طول بيفتكروهم مجانين..وللأسف لازم نحافظ علي صورتنا قدامهم...

سلمي:فعلا الناس المتخلفه كتير..أووووف....

يوسف:هو حضرتك متضايقه من حاجه..

سلمي:هو أنتا رغاي كده ليه؟؟..

ساعتها سكتت مش عارف أقول أيه أنا فعلا الغلطان عشان بتكلم مع واحده مجنونه...بس بعد شويه صغيرين قالتلي : أنا اسفه أني أتكلمت بالأسلوب ده..مش أقصد والله بس أنا بتعصب بسرعه..ياريت متكونش زعلان مني..

يوسف:لا أبدا..بس أنا مش رغاي أنا بس حسيت أنك متضايقه من حاجه.. حبيت أخرجك من الجو ده..

سلمي بعصبيه شديده: وهو مين قالك أني متضايقه ولا زعلانه من حاجه...أنتا بتتكلم كتير اوي ف اللي ملكش فيه..لو سمحت حضرتك خليك ف نفسك...

يوسف: واضح جدا أنك عصبيه أوي زي مبتقولي...

سلمي:علي فكره أنتا أنسان مستفز جدا..وخلتني أخرج عن شعوري حضرتك أحنا هنا ف عياده محترمه مش ف كازينو وحضرتك جاي تستخف دمك عليه..سوري يعني أني بكلمك بالطريقه ديه..بس أنتا فعلا أنسان مستفز جدااا...

يوسف:لأ أنا مستفزتكيش ولا حاجه...أنتي اللي مش طايقه نفسك..لازم تكوني أهدي من كده وتعرفي تتكلمي مع الناس كويس...

سلمي:أعرف أتكلم مع الناس كويس...أنتا مين أنتا عشان أكلمك أصلا...

ف الوقت ده دخل الدكتور عاصم....

د عاصم:أذيك يا أنسه سلمي...عامله أيه...مالك شكلك عصبيه جدا..أنا أسف أني أخرتك بره الوقت ده كله...

سلمي:لأ أبدا يا دكتور...أنا مش متضايقه من التأخير..ممكن نبدأ الجلسه دلوقتي...

د عاصم :أه طبعا...

وبعدين ألتفت ناحيتي وكأنه أول مره يشوفني وقالي: يوسف أذيك...هو أنتا معادك النهارده..

يوسف:أيوه يا دكتور..بس الظاهر مش هينفع..

د عاصم:بس أنا افتكر أن معادك بكره مش النهارده...

يوسف:يا دكتور أنا معادي مع حضرتك النهارده.. الأتنين الساعه 9...وأنا جاي حسب المعاد..

د عاصم:النهارده الحد يا باش مهندس...واضح أن حالتك متأخره أوي...أنا مستنيك بكره حسب المعاد متتأخرش...

عارفين طبعا أن غلطه زي ديه قدام طبيب نفسي معناها أيه..المهم دي كانت أول مره أتكلم فيها مع سلمي..كان باين عليها رقيقه أوي وبنت ناس أوي بس فيه حاجه كبيره مضايقاها أو هي مجنونه فعلا وبتتعالج أو أنا اللي كنت مستفز زي مهي قالت..مش عارف..بس اللي أنا فاكره ف اليوم ده أني خرجت من عيادة دكتور عاصم ومفيش ف دماغي حاجه أسمها سلمي...

من طرف **Just Zizo0o0o** الثلاثاء فبراير 03, 2009 12:49 am

امال كان ايه الي في دماغك ؟

متابع

من طرف yusuf الثلاثاء فبراير 03, 2009 12:53 am

بعد الغسله النضيفه ديه لازم ميبأش فيه ف داغي حاجه خصوصا أني بتعامل مع بنت ف عياده نفسيه يعني ممكن ببساطه تطلع مجنونه (سوري يا سلمي)
بس خليك معايا عشان فيه مفاجأت كتير ف الأخر والدنيا هتتقلب

من طرف **Just Zizo0o0o** الثلاثاء فبراير 03, 2009 1:12 am

لا انا معاك ما تقلقش كمل انت بس

برضو متابع

من طرف **MARYEM** الثلاثاء فبراير 03, 2009 2:31 am

كمل كمل انا مستنية اعرف االباقى

من طرف **Crespowbas** الثلاثاء فبراير 03, 2009 4:25 pm

سلمى عمرها ما تزعل من حببها يا برنس

كمل انت بس

من طرف زائر الثلاثاء فبراير 03, 2009 6:42 pm

أنتا تعرف أكتر مني يا كرسبو وربنا يوفقك ف السكه اللي أنت ماشي فيها دلوقتي
كمل يا يوسف أنا متابع بس منكنتش عايز أرد لحد م أعرف أنتا رسيت علي أيه
كان باين م الأول أن مفيش ف دماغك حاجه
بس أتتا دلوقتي عارف أنتا رايح علي فين
أنا معاك

من طرف salmaa الثلاثاء فبراير 03, 2009 8:04 pm

كمل يا يوسف أنا متبعاك

من طرف **Just Zizo0o0o** الثلاثاء فبراير 03, 2009 9:32 pm

هو يوسف انتحر ولا ايه

كمل يا عم الناس كلها مستنياك

من طرف **RANEEM** الأربعاء فبراير 04, 2009 12:37 am

القصه دي عامله زي القصص الي كنت بقراها زمان
وحكايتكو زي الافلام العربي
كمل كمل

من طرف **Crespowbas** الأربعاء فبراير 04, 2009 12:46 am

أنتا تعرف أكتر مني يا كرسبو وربنا يوفقك ف السكه اللي أنت ماشي فيها دلوقتي

يارب

بس انا مكنتش بقولك انت انا كنت بقول ليوسف يا برنس عادى يعنى بدلعه

هههههههههههههه

بس انت برنس برضو يا برنس

من طرف **Just Zizo0o0o** الأربعاء فبراير 04, 2009 12:48 am

هههههههههههههههههههه

صايع

من طرف salmaa الأربعاء فبراير 04, 2009 2:43 am

سوري يا جماعه يوسف متضايق شويه ومش هيقدر يكون معانا النهارده...

بس أنا عايزه أقول حاجه أنا مش مجنونه زي م يوسف كان فاكرني أنا فعلا كنت متضايقه أوي ف اليوم ده مش فاكره كان فيه أيه بالظبط بس هو اللي أستفزني شايفين كان بيكلمني أذاي فكان لازم أتضايق طبعا وأرد عليه كده ولا هو فاكرني مليش لسان..أنا أصلا مش مجنونه أوي يعني أنا مجنونه زي كل الناس اللي ف الدنيا مهم مجانين..كل اللي عندي أضطرابات نفسيه مش عارفه أيه سببها وديه حاجه بسيطه..

أنا مش هكتب ف حكايتي أنا ويوسف عشان أنا مش بعرف أحكي بس أنا عايزه أدون هنا ذكري مش ممكن هقدر أنساها صدقوني الكلمه ديه حقيقيه مش هقدر أنساها..

ف اليوم اللي أنا بتكلم فيه ده كنت سعيده جدا وأول م شوفت يوسف فرحت أوي أنا كنت فاكره أنه بيتهيألي...نزلنا مع بعض من عيادة دكتور عاصم كانت أول مره نخرج فيها أنا وهو...مش فاكره الكلام كان أيه بس فاكره أنا كنت حاسه أيه ساعتها وكنت شايفاه أذاي....أنا مكسوفه جدا....لالا أنا مش هدون الأحساس ده يا يوسف دي حاجه عمري م هنساها...

يوسف إنسان طيب أوي أوي وبيحب كل الناس بس هو ساعات بيبأه عصبي وبيكون علي حق أنا بشوفه كده بس بعد شويه صغيرين بيرجع يندم ويقول يارتني معملت كده مش بيحب يكون وحش مع حد بس ده بيكون لازم ساعتها..هو ده المرض لنفسي اللي عنده...أنا حاولت معاه كتير بس هو كده بيزعل أوي وبيصعب عليه ساعات لما مبعرفش أخرجه م الجو ده...

بزعل منه ف حاجات كتير..هو بيغير عليه زياده عن اللزوم..مش زياده عن اللزوم أوي بس متمسك بعادات وتقاليد كتير أختفت ف الوقت ده وبيخنقني..يعني لأ متخرجيش لواحدك أبدا..لازم بابا يبأه معايا أو هو وأنا متعوده دايما أخرج لواحدي ومحدش بيكلمني ف حاجه..عشان كده أن بزعل بس برجع أفكر تاني وأقول لنفسي هو بيعمل كده عشان بيحبني أوي ف أسمع كلامه بس هو ساعات بيزودها شويه وده بيزعلني أوي..وبرده لما أكون لابسه حاجه ضيقه شويه بيبأه ناقص يضربني...

مسميني خميرة العكننه..عشان دايما بحب أزهقه وساعات كده مش بحب أسمع كلامه وأعمل حاجه هو قالي متعمليهاش وأنا عارفه أنها غلط عشان أشوفه هقولي أيه..هيزعل ولا عادي مش فارقه معاه دلوقتي...بس المشكله بأه أنه بعد ميتكلم كتير أوي ويوجع دماغي بده مينفعش ده ميصحش يرجع يناقشني ويعملي فيها دكتور نفسي ويفضل يحلل ف شخصيتي علي مزاجه..ويطلعني مبفهمش حاجه..

أخر حاجه عايزه أدونها دلوقتي

أنا بحب يوسف أوي أوي أوي

من طرف **A.S.Shiko0o0o** الأربعاء فبراير 04, 2009 4:04 am

يا بختك يا عم

ربنا يهنى سعيد بسعبده

من طرف salmaa الأربعاء فبراير 04, 2009 6:52 am

يارب يا شيكو تحقق كل اللي بتحلم بيه

من طرف yusuf الأربعاء فبراير 04, 2009 11:07 pm

أنا أسف جدا علي التأخير..
تاني يوم ف المعاد..(الأتنين الساعه 9)..روحت لدكتور عاصم العياده وكان مستنيني وأبتدينا الجلسه علي طول...
..يوسف هو أنت بتحلم بأيه؟..
..مبحلمش..
..عمرك محلمت خالص ف حياتك..
..زمان لما كنت صغير كنت بحلم كتير..
..فاكر حاجه م الأحلام ديه..
..حلمت مره أن أنا بطلع فوق حاجه عاليه أوي..وبعدين بقع..
..ليه قولت الحلم ده..مش فاكر غيره..
..لأ فاكر..بس ده اللي جه ف دماغي..
..طب قول حلم تاني..أحكيه بالتفصيل..علي قد م تقدر..
..ف الوقت اللي هحكي فيه الحلم ده كنت عايش قصة حب كبيره أوي..كانت مسافره تاني يوم..ف الحلم..وفضلنا مع بعض طول الليل نتكلم..لحد الصبح..وجه المعاد اللي هتمشي فيه..وصلتها لحد العربيه......
..كمل..سكتت ليه..قول كل حاجه..
..وبعدين.....
..ودعتها وطبعا بوستها..ولا أيه؟..
..أه..
..بس كده..
..بس كده..
..بس أنا لما سألتك أنتا بتحلم بأيه..كنت أقصد أنتا عايز توصل لأيه؟؟..
مش عارف ليه الأحساس الغريب ده جالي أول م قالي كده..حسيت أن فيه حاجه جوايه مكسوره..كأني كنت ناسي..
..ولا حاجه..
ليه؟؟..
..مش عارف..
..أقولك أنا ليه..أنتا لما بتخسر حاجه بتفضل علي طول فاكرها..بتعيش ف كل حاجه زياده عن اللزوم..عشان كده مبتستحملش الخساره أو بيتعبك الأحساس ده..وتعيش فيه كتير وثقتك ف نفسك تتهز..وتحس أنك مش هتقدر تعمل أي حاجه..وبتبأه سلبي جدا مع نفسك..ومبتاخدش غير اللي بتلاقيه قدامك بس..
..بس أنا بقبل الخساره واللي أحسن مني بقوله أنتا أحسن مني..
..بس أنا عايزك برده تسيطر علي نفسك أكتر من كده شويه كمان..
..أسيطر علي نفسي ف أيه؟؟..أنا مش مجنون يا دكتور وحضرتك عارف وقولتلي كده..
..أنا أقصد متتعصبش أوي عشان أي حاجه..حاول تكون هادي علي طول..ومتفرحش أوي برده بأي حاجه..
..وديه معناها أن أنا مش طبيعي..
..لأ..دي حاجات طبيعيه جدا بس عندك أنتا زياده شويه..لازم تسيطر علي نفسك أكتر من كده..وبعدين متقولش علي نفسك مجنون تاني..
..حاضر..
..كمان عايزك تبص حوليك وتفكر كويس..وتشوف أنتا عايز توصل لأيه؟؟..أنتا مشتت يا يوسف عشان معندكش حاجه عايز تحققها..ف بتتشد لكل حاجه بسرعه..لازم يكون عندك هدف واحد كبير تركز فيه وتحاول توصله..
..عندك حق..
..أنتا هترجع الشغل أمتي؟؟..

أتكلمنا ف مواضيع كتير أوي ف اليوم ده..ساعات وأحنا بنتكلم كنت بحس أن دكتور عاصم هو اللي مجنون..
متناقض مع نفسه جدا..لما سألته المره اللي فاتت عن سلمي أداني محاضره كبيره أوي عن شرف المهنه وأن الطبيب النفسي ده بيشوف البني أدم علي حقيقته عشان كده مينفعش يتكلم عنه ف أي حاجه..بس وأنا ماشي لقيته بيقولي..
..يوسف هو أنتا تعرف سلمي..

من طرف **Crespowbas** الخميس فبراير 05, 2009 12:32 am

انت جامد اصلا يا برنس وربنا

هو انت كدة على طول يا يوسف برنس

الله ينور
عاوزين بقى نشوف
مواضيع كتير بقى

وكدة يا ريس

ربنا يوفقك يارب

بجد
المدونه ديه حكايه

وانا متبعها بتشوق كمان

من طرف زائر الخميس فبراير 05, 2009 12:36 am

أنا كمان معاك

من طرف **MARYEM** الخميس فبراير 05, 2009 1:02 am

وانا وانا كمل يايوسف متتاخرش وربنا يهنيك انت وسلمى

من طرف **MeRaMoRe** الخميس فبراير 05, 2009 1:30 am

وااااااااااااااااااو بجد بجد المدونه دي فكره حلوه اوي اوي

انا فرحانه عشانكم جداااااا ربنا يحميكم ويوفقكم

بس ماتتأخرش يايوسف علينا

عايزه اوضحلك حاجه 99% من المنتدى الفضول عندهم زيااااااااااده يعني ماتشوقناش وتسيبنا

من طرف **Crespowbas** الخميس فبراير 05, 2009 1:39 am

انا واسلام ومريم وميرا معاك

انجز

من طرف **Just Zizo0o0o** الخميس فبراير 05, 2009 4:24 am

وانا خدوني معاكم ههههههههههههههههه

صايع

من طرف yusuf الخميس فبراير 05, 2009 6:13 am

منرضاش
يخاصم القمر السما
منرضاش
تدوس البشر بعضها
منرضاش
يموت جوا قلب ندا
منرضاش
تهاجر الجزور أرضها
منرضاش
قلبي جواي يغني
الأجراس تدق لصرخة ميلاد
تموت حته مني
الأجراس بتعلن نهاية بشر من العباد
الحكمه قتلتني وحييتني
وخلتني أغوص ف قلب السر
قلب الكون
قبل الطوفان م ييجي
خلتني أخاف عليكي
وأحكيلك علي المكنون
مين اللي عاقل فينا مين مجنون
مين اللي مدبوح م الألم
مين اللي ظالم فينا مين مظلوم
مين هو صاحب المسأله
والمشكله
والحكايه والقلم
رأيت كل شيئ وتعبت علي الحقيقه
قابلت ف الطريق عيون كتير بريئه
أعرف بشر
عرفوني لأ لأ معرفونيش
قبلوني وقبلتهم
بمد أيدي لك
طب ليه متقبلنيش
لا يهمني أسمك لا يهمني عنوانك
لا يهمني لونك ولا بلادك
مكانك
يهمني الأنسان ولو ملوش عنوان
يا ناس يا ناس يا مكبوته
هي دي الحدوته
هي دي الحدوته

من طرف **Crespowbas** الخميس فبراير 05, 2009 2:53 pm

فنان

من طرف **A.S.Shiko0o0o** الجمعة فبراير 06, 2009 2:25 am

GAMED

من طرف **MARYEM** الجمعة فبراير 06, 2009 2:31 am

جاااااااامد

من طرف **Just Zizo0o0o** الجمعة فبراير 06, 2009 5:18 am

ايه العلاقه طيب

زيهم بقي

جاامد

من طرف yusuf السبت فبراير 07, 2009 1:16 am

..يوسف هو أنتا تعرف سلمي..
كان سؤال دكتور عاصم غريب أوي..هو بيسأل السؤال ده ليه؟ وبعدين أنا هعرف سلمي أذاي وأحنا لسه شايفين بعض من كام يوم؟..

وبعد م كنت ماشي رجعت تاني وكلمني عنها..قالي..

..سلمي أبتدت علاجها معايا من أسبوعين..مش عارف أحلل المرض اللي عندها لحد دلوقتي..حكتلي مره عن حد هي بتحلم بيه..ولما سألتها أنتي تعرفيه ولا لأ..قالتلي لأ..حتي لما قولتلها أوصفيهولي قالتلي مش فاكره..حاسس يا يوسف أن أزمتها مع نفسها كان سببها حد هي حبته أوي ودلوقتي هو مش موجود ف حياتها..بعد الموقف اللي حصل بينك وبينها أمبارح كلمتني عنك..قالتلي أن أنتا اللي هي حلمت بيه..حاسس أن فيه حاجه غامضه..سلمي أغرب حاله شوفتها لحد دلوقتي مش عارف أيه سر مرضها..أو أيه مرضها ده أصلا..وليه قالت أنها حلمت بيك أنتا مع أنك بتقول أن ديه أول مره تشوفها وهي كمان لما أنا سألتها قالتلي أنها متعرفكش..

دكتور عاصم كان فاكر أني أعرف سلمي وأفتكر أني ممكن أقدر اساعده ف علاجها عشان كده كلمني..بس أنا فرحت أوي لما عرفت أنها حلمت بيه حتي من قبل م تشوفني..زي الأفلام العربي كده…

فكرت فيها كتير..

وبعد يومين دكتور عاصم عمل جلسة علاج جماعي..كان فيه 3 موجودين أتعرفت عليهم وأبتدينا الجلسه..من غير سلمي…

العلاج الجماعي ده أسلوب جديد ف الطب النفسي..كل الحالات اللي قريبه من بعضها بيتقابلوا وبيتعرفوا علي بعض وكل واحد بيتكلم عن مشكلته اللي هو شايف أنها أثرت عليه أوي لحد م حس أن عنده أزمه نفسيه ولازم يروح لدكتور..وف أغلب الأحيان بيكون المريض مش عارف أيه سبب الأضطرابات اللي عنده ديه..وساعات كتير أوي بيكون فاكر أن السبب حاجه معينه حصلتله ويفضل يحكي فيها كتير بس الحقيقه أن المرض اللي عنده سببه حاجه تانيه خالص..تفاصيل صغيره هو مبياخدش باله منها..دا بالنسبه للمرضي العاديين اللي زيي أنا وسلمي وكل اللي كان موجود ف الجلسه ديه..

الظاهر من كتر م أتكلمت مع دكتور عاصم بقيت بفهم شويه ف الطب النفسي…

سلمي جت ف اليوم ده متأخره شويه..كان باين عليها المرادي مش متضايقه من حاجه بالعكس حسيت أنها فرحانه كمان معرفش أيه السبب لحد دلوقتي معرفش ايه السبب بس أنا كمان فرحت أوي لما شوفتها...

سلمي حد يتحب بسرعه أو أنا اللي هوائي زي م قولت ف الأول لسه مش عارف..بس ف اليوم ده قربت من سلمي أوي هي أتكلمت ف حاجات كتير..

أتكلمت عن بيتها اللي حاسه أنه بأه غريب عليها..وعن والدها والدتها اللي حاسه أنهم متغيرين معاها..قالت أن حصل بينها وبينهم مشاكل كتير ف الفتره الأخيره..هي متعوده دايما تعمل اللي هي عايزاه واخده حريتها بالكامل ومبتعملش حاجه غلط..وبعدين فجأه كده وبدون مقدمات لقيت والدتها بتكلمها ف حاجات كتير..مينفعش تخرجي بالليل لوحدك؟؟..أنتي بتروحي فين؟؟..سلمي أتكلمت كتير..

..مبقتش أعرف أتكلم معاهم..دايما كل م نتناقش يتقلب الموضوع لمشكله كبيره أوي..وبكون مضطره أني مسمعش كلامهم وأعمل اللي أنا عايزاه..أنا عارفه هما بيعملوا كده ليه..فاكرين أني مرتبطه بحد تاني ومش عايزه أقول عشان كده أنا رفضت العريس اللي بابا جايبه..بس أنا مفيش حد ف حياتي حتي مليش أصحاب..مليش حد ف الدنيا غير بابا وماما..بس حتي هما ساعات بحس أنهم مش هما وأنهم متغيرين..أو أنا اللي متغيره..مش عارفه أيه اللي مخليني شايفه كل حاجه حوليه مش هي..

بمل من أي حاجه بسرعه وعشان أخرج من مود الملل ده بعمل حاجات مجنونه كتير..أي حاجه بتيجي ف بالي بعملها..أمبارح بالليل خدت العربيه وطلعت المقطم لوحدي..مخوفتش أن حد يترازل عليه ولا يحصلي حاجه..بس بعد ربع ساعه بالظبط نزلت تاني..ملل….

كل م أكون لوحدي وأفكر ف نفسي..بحس أن فيه حاجه نقصاني..حاجه أنا محتاجلها أوي..بس مش عارفه أيه الحاجه ديه..وساعات تانيه بحس بالذنب علي ايه برده مش عارفه…

منطويه جدا..وأي حد بيحاول يكلمني بحس أنه عايز يتعرف عليه وأنه بيحبني وبصده أوي وممكن أقوله كلام وحش كمان..مع أنه ممكن يكون بيكلمني عادي..معرفش ليه أنا بقيت وحشه مع الناس كده..

بيحصل معايا كتير أني اشوف حد ويجيلي شعور غريب أني أعرفه..مع أني عمري م شوفته قبل كده..

بعد الجلسه م أنتهت كل اللي كان موجود مشي ماعدا أنا وسلمي..كان دكتور عاصم عايز يشيل سوء التفاهم اللي حصل بينا..أعتذرتلها علي اللي حصل المره اللي فانت وقولتلها أن أنا سعات بكون عصبي وبقول كلام وأنا مش عارف أنا بقول أيه..هي كمان قالتلي أنها خلاص مش فاكره حاجه…

كانت متغيره أوي عن المره اللي فاتت..كانت طبيعيه جدا وبتضحك..بنت رقيقه أوي وحلوه أوي أوي أوي…

ف اليوم ده خرجنا من عند دكتور عاصم وأحنا أصحاب..وصلتها لحد العربيه ولقيتني بقولها..

..سلمي أنا مش هشوفك تاني..

سكتت شويه..وبعدين قالتلي..

..عادي..

قالت الكلمه ديه ومشيت..

هو أنا بحبها ولا أيه؟؟...

كانت الدنيا زحمه أوي ومفيش تاكسي راضي يقف..وبعد خمس دقايق لقيت عريبه جايه عليه بسرعه وقامت واقفه قدامي..ولقيت سلمي بتقولي..

..يوسف أنا مخنوقه جدا م البيت ومش عايزه أروح دلوقتي..ومش عايزه أكون لوحدي..

كانت بتسوق بسرعه أوي..مجنونه..وأنا كمان..

من طرف **A.S.Shiko0o0o** السبت فبراير 07, 2009 1:18 am

ههههههههههههههههههههههههههههه

لا انا مش زى حد انا قولت

GAMED

من طرف **MARYEM** السبت فبراير 07, 2009 1:26 am

كمل كمل مستنين الباقى

من طرف **Just Zizo0o0o** السبت فبراير 07, 2009 5:53 am

واو بتسوق بسرعه

بموت في الهاي واااااي

من طرف yusuf السبت فبراير 07, 2009 6:49 pm

أيوه بتسوق بسرعه خطيره هاي واي..بس ديه مش المشكله المشكله أن بعد ربع ساعه كنا ف المقطم..نفس المكان اللي راحته لوحدها أمبارح..سألتها...

..ليه المقطم بالذات؟..

..بحب المكان ده..بحس وأنا هنا أني مرتاحه أوي...

..له ذكري عندك؟..

..لعلمك أن عمري م خرجت مع حد بس أنا مرتاحالك..حاول تفهم كده..

حاولت أمسك أديها..بس هي شدت أديها بسرعه وقالتلي..

..علي فكره أنا مش زي م أنتا فاكر..ولو هنبتديها م الأول كده يبأه نروح أحسن..

..سلمي..أنا أسف..

..متعملش كده تاني..

كل حاجه ف علاقتي أنا وسلمي كانت غريبه..مش طبيعيه..ممكن عشان أحنا الأتنين مش طبيعين وبنتعالج عند طبيب نفسي..وده يفسر تصرف سلمي الغريب لما رجعتلي تاني وطلبت مني أني أكون معاها..وأنها حاسه بوحده..

ولا عشان أحنا الأتنين محتاجين لنفس الحاجه ف قربنا من بعض بسرعه..

كان أحلي يوم ف حياتي أنا وسلمي اليوم ده أتكلمنا ف كل حاجه..سألتني..

..يوسف..أنتا عمرك م حبيت ف حياتك..

كان سؤلها له معني كبير أوي عندي..أكيد هي أبتدت تحبني..وعشان كده قولتلها..

..لأ..

..خالص..

..مره حبيت بنت بس محصلش نصيب..

..ليه..أيه اللي حصل؟..

..طلعت بتحب واحد تاني..

..أذاي؟..يعني بعد مكانت حبتك سابتك وحبت واحد تاني..

..لأ هي أصلا مبحتنيش..بس أنا كنت بحبها..

..أنا مش فاهمه..ممكن توضح...

..ببساطه كده أنا حبيتها وحاولت أخليها تحبني بكل طريقه..بس منفعش..وبعدين جت ف يوم قالتلي أنها بتحب واحد تاني..

..وبعدين؟؟..

..مكنش ينفع أكمل عشان كده بعدت..

سكتت كأنها بتفكر ف حاجه وساعتها أنا سألتها نفس السؤال..قالتلي..

..مش فاكره أني حبيت بجد قبل كده..

..يعني أيه حبيتي بجد..

..معرفش..بس الأحساس اللي كل الناس بتتكلم عنه أنا معشتوش..لسه ملقتش حد يحبني بجد..

أتكلمنا كتير أوي ف اليوم ده..سألتني..

..أنتا بتشتغل أيه؟؟..

..مهندس..بس دلوقتي مبشتغلش..

..ليه؟؟..

..اجازه طويله..

..أجازه طويله..قد أيه يعني؟..

..دلوقتي بقالي سنه مبشتغلش..

..طب ليه الأجازه ديه؟..

..فيه حاجه أهم عندي من شغلي دلوقتي..لو وصلتلها هبأه حققت كل اللي بحلم بيه..

..أيه الحاجه ديه؟؟..

..مش هينفع أقولك دلوقتي..بس أوعدك لما تحصل هتكوني أني أول حد يعرف..

..دي شكلها حاجه كبيره أوي..

..أهم حاجه ف حياتي..

أتكلمنا ف حاجات كتير أوي ف اليوم ده..

وأتقابلنا كتير بعد كده..وكل يوم كنا بنتكلم ف التليفون...بس فيه حاجه غريبه..هي عمرها م أتصلت بيه..أنا اللي كنت دايما بكلمها..عمري م كنت بتضايق من كده..أنا عارف سلمي أيه دلوقتي سلمي بتحبني..وأنا كمان بحبها من زمان..

وف يوم أتقابلنا وروحنا سينما..كان فيه فيلم معروض..بيتكلم عن بنت بتحب ولد وبعدين أهلها بيفرقوا بينهم وهي بتبعتله جوابات كتير بس مكنش فيه حاجه منها بيوصله عشان أمها كانت بتاخدها قبل م يوصللوله ولما فقدت الأمل فيه بعد سنه أتعرفت علي ظابط ف الجيش..وحبته وبعد سننين رجعت تاني البلد اللي قابل حبيبها الأولاني فيه..بس كانت ف الوقت ده خلاص هتتجوز التاني..وبعد ترد كتير أوي..أختارت حبيبها الأولاني..اللي كان لسه بيحبها...

كانت سلمي بتسمع الفيلم وهي بتعيط..وكانت أدينا ف أيد بعض

أتقابلنا أمبارح..وأول م شفتها قولتلها..

..سلمي تتجوزيني؟...

سكتت..كان مفاجأه ليها..وبعدين قالتلي..

..موافقه..

سلمي بتحبني بجد..والنهارده لازم أقولها علي كل حاجه وربنا يستر..أدعولي يا جماعه...

من طرف yusuf السبت فبراير 07, 2009 6:51 pm

ياريت يا جماعه محدش يسخف من حاجة حد هو معملش معاه حاجه وحشه
شكرا

من طرف **Just Zizo0o0o** السبت فبراير 07, 2009 7:02 pm

ايه ده اوعي تكون زعلت من الهاي واي انا بهزر معاك اصلي زهقت من كلمه كمل فا قلت تغيير يعني بس انا عندي استفسار

هي مش كانت في الاول مش موافقه تمسك ايدك ازاي بعد كده مسكتها يعني وانتو في السينما

وابقي قلي اسم الفيلم ده ايه عشان عاوز اشوفو

من طرف **RANEEM** السبت فبراير 07, 2009 11:42 pm

ايه الجمال ده
هو في كده دوقتي
يلا كمل
ربنا يوفقك