ازاي تنقي كلامك وتتكلم مع الناس؟

السلام عليكم ورحمة الله وبركاته

عمرك لاقيت إنك مش عارف تتواصل مع حد معين؟؟ رغم إنك فعلا عايز تكلمه؟
لاقيت مرة واحد مابتحبش تتكلم معاه خالص؟؟ كده لله في لله؟؟

هل مرة لاقيت إنك مش عارف تبيع سلعتك للزبون بتاعك رغم إنك حاولت بكل إخلاص؟
أكيد أيوه.. مش كده؟

طيب.. هنتكلم النهارده عن حاجة من الحاجات اللي هتفيدك في التواصل مع الناس بصورة أفضل..
والحاجة دي اسمها (التحدث بإيجابية)..

فى البداية لازم نعرف حاجه مهمة اوى عن عقلنا اللاواعى
وعشان نعرفها هنعمل مثال بسيط..

انا هقول جملتين ولازم تركز فيهم اوى وتنفذ اللى فيهم:

الجملة الأولى
( متفكرش فى وردة حمرا )

خلاص اتفقنا فكرت ولا لا
طب جرب دى كده

( ماتتخيلش عربية سودا )

؟؟؟

خدت بالك من اللى حصل ؟
انت فكرت فى الوردة الحمرا واتخيلت العربية السودا ..!
طب ليه مع انى طلبت منك العكس

اللي حصل يا جماعة إن العقل اللاواعي بتاعنا مابيسمعش الكلام قوي..
ببساطة بياخد الجملة ويقعد يفكر فيها كلمة كلمة عشان يقدر يستوعبها..
فعشان تفهم الجملتين اللي فاتوا كان لازم العقل اللاواعي بتاعك يتخيل .. الوردة والسيارة السوداء!

يعني إيه؟؟
يعني لو عايز أأثر على العقل اللاواعي للشخص اللي باتكلم معاه
،ومش عايزه يفكر في وردة حمراء.. يبقى لازم الجملة مايبقاش فيها وردة
حمراء.. صح كده؟؟
طبعا المسألة مش مسألة وردة حمراء وسيارة سوداء..

عشان تفهم قصدي اقرا الأمثلة دي:

البائع: الأسعار بتاعتنا مش غالية.. إحنا مش حرامية ونصابين!

الجملة دي غلط تماما وهتأثر في اللاشعور بتاع الزبون..
هيلاقي نفسه ببساطة (مش مستريح) للصفقة دي، ومش لازم يكون عارف ليه..
لكن ..احنا عارفين طبعا..

جملة (مش غالية) دي هيركز اللاشعور على كلمة (غالية) لا إراديا..
والجملة التانية (احنا مش حرامية ونصابين) هيفهم منها إنهم (حرامية ونصابين)!
يبقى المفروض البائع يقول مثلا: أسعارنا مناسبة جدا.. إحنا يهمنا ثقة العملاء!

نفهم من كده إيه؟؟

نفهم إن إنت لو عايز تأثر في اللي قدامك بحاجة، يبقى لازم تستخدم الكلمات الإيجابية المناسبة اللي تخلق جو من الراحة في نفسه.. زي (رائعة) و(ثقة) في المثال اللي فات... واهرب من الكلمات السلبية زي (غالية) و(حرامية ونصابين) حتى لو نفيتها.. زي ما عرفنا مع بعض..

طيب ناخد مثال تانى :

الطبيب: ماتخافش.. الحقنة مش بتوجع خالص.

هه.. إيه رأيك في المثال ده؟؟

يللا مع بعض نطلع الكلمات السلبية:
أول كلمة سلبية هي: (ماتخافش).. دي هتخليه يخاف أصلا لأننا ذكرنا الخوف..
ثاني كلمة سلبية هي: (مش بتوجع).. دي هتخليه يتخيل الألم والوجع..
يبقى المفروض يقولها ازاي؟؟

الطبيب: اطمئن.. هتحس براحة بعد ثواني!
(ملاحظ إننا ماذكرناش كلمة "حقنة" أصلا؟)

طيب هناخد مثال كمان عشان نستوعبها أكتر:

البنت لخطيبها: ماتقلقش يا حبيبي.. عمري ما هاخونك أو أكرهك!!!
طبعا كلنا حسينا بصدمة من الكلام ده.. لكن إحنا عرفنا ليه.. عشان الكلمات السلبية زي:
ماتقلقش- هاخونك – أكرهك!!!

المفروض الجملة دي تتقال كده:

البنت لخطيبها: اطمئن يا حبيبي.. أنا مخلصة لحبنا وهافضل أحبك على طول!!

شايف الجمال اللي في المعنى؟؟ مع إننا ممكن نلاحظ ببساطة إن الجملتين لهم نفس المعنى...

نستفيد من الكلام ده إيه بقى؟؟

مهم جداً معنى الكلام الذي نقوله.. والأهم هو: كيف نقول هذا المعنى..
استخدم كلمات إيجابية دائما في حياتك.. ولاحظ الفرق الذي سيحدث في علاقاتك مع الناس..

واعرف الحقيقة دي.. الناس اللي بيستخدموا كلمات سلبية كتير في كلامهم،
الناس بتبتعد عنهم ومش بتحب تتكلم معاهم.. افتكر حد مش بتحب تتكلم معاه.. يا ترى إيه السبب؟؟ بيشتكي دايما من الظروف؟ بيشتم كتير؟ بيثير الإحباط؟؟ ركز في كلامه هتلاقي الكلمات اللي قلنا عليها.. الكلمات (السلبية)..

على عكس الناس اللي بتحب تتكلم معاهم.. فكر في واحد بتحب تتكلم معاه وبتستمتع بكده.. مبتسم؟ متفائل؟ بيهون على الناس اللي حواليه مشاكل الحياة؟ ركز في كلامه هتلاقي الكلمات اللي بنقول عليها: الكلمات (الإيجابية)

------------------------

قبل ما نختم بقى تعالوا نلعب لعبة:

اختار الجمل والكلمات الإيجابية اللي توصل المعنى بصورة صحيحة

أنا مش عبيط.. أنا فاهم كل حاجة..

خليك ذكي وركز معايا..

الجو النهارده كويس..

يا باشا البضاعة بتاعتي مش بتعفن بسرعة!

اطمن.. الموضوع بسيط!

هابطل السجاير، واكون إنسان جديد!

البارفان ده ريحته مش وحشة خالص.. بالعكس!

مش هاخذلك يا معلم!

أنا إرادتي قوية جدا.. ثق في كده!

ماتبقاش غبي يا بني.. فتح مخك معايا!

طبعا حليت الواجب كله لوحدي.. إنت فاكرني باكدب؟

----- خلصوا -----

حلها بقى بروقان واعرف إنت بقيت متحدث إيجابي ولا لأ..
مرن نفسك من النهارده على إن كلامك يكون إيجابي.. ولاحظ الفرق اللي هيحصل في حياتك...

.. حط بقى مرادفات (إيجابية) للجمل (السلبية) اللي فاتت
لو حبيت... وياريت بجد نجرب مع نفسنا مرة واتنين وانا برده هجرب معاكم يارب تكون فكرتي وصلت وتعجبكم

من طرف **snow white** الأحد أكتوبر 28, 2007 11:52 pm

تصدق انا طلعت سلبيه جدا
حتي مش عارفه العب اللعبه
بس هحاول وابقي اقولك

ههههههههههههه يا سنو هوايت يعني خلي كلماتك تكون ايجابيه وكلام جميل عشان لما الكلام يعلق في دماغه يلاقيه كلام كويس ويرتاحلك في الكلام يعني مثلا جملة يا باشا البضاعة بتاعتي مش بتعفن بسرعة! كلمة بتعفن دي بتدي للواحد ايحاء انها معفنه او تقلقي منها عكس لما يقول البضاعه بتاعتي اجمل بضاعة في السوق جملة تانيه البارفان ده ريحته مش وحشة خالص.. بالعكس! فيها ايه لما نقول البرفان ده ريحته جميله موووت كلمة جميله بتعلق في دماغه وبالتالي بيحس ان البرفان بجد حلو عكس لما يقول ريحته مش وحشه هتحسي ان ريحته برده مش اد كده يارب نكون فهمنا حاجه ههههههههههه

ازاي تنقي كلامك وتتكلم مع الناس؟

ازاي تنقي كلامك وتتكلم مع الناس؟

رد: ازاي تنقي كلامك وتتكلم مع الناس؟

رد: ازاي تنقي كلامك وتتكلم مع الناس؟