يوميات شردوحه مصريه

من طرف **DeBo0o** الأحد يناير 25, 2009 2:40 pm

الشردوحة المصرية

سيدة أكل الدهر من عمرها ما أكل, و داعبت الأقدار وجهها بشتى صنوف الآثار و العلامات من بشل و غرز و ضربات موس حلاقة .

فحلة في الغالب تمشي تجر ورائها كيلوهات من اللحوم و الشحوم
لولا انتهاء زمن الملاية اللف لن تراها أبدا إلا متلفلفة بهذا الشيء الأسمر الكئيب
و كما قال الشاعر :

أصل البلد يا ولد هيااا الملاية اللف

لا تقولي بدي.. ولا تي شيرت.. ولا جيبة قد الكف

أول ما يقع نظرك عليها تدرك مباشرة انها شردوحة مصرية
سليطة اللسان كبيرة الحجم غير متناسقة الشكل و الهيئة ...

كنت سابحا في بحر من الأفكار و التأملات قطعها صوت ارتطام الباب بالحائط اثر رفسه آدمية قوية .
و إذ بسيدة في العقد الرابع من عمرها تحجب سكرتيرتي الرقيقة حلفها التي ما ان رأتها حتى أصيبت بسكتة كلاميه من ضخامة جثتها و دمامة خلقتها و شكلها الغريب
رغم علمي أن الملاية اللف قد انتهي زمنها و آثرها
فقد رأيت ما هو أهول و افزع مشهدا ً منها .

ربطة ايشارب جانبية الشكل كماسورة مدفع هاون
شيء غريب لا اعرف اسمه و لكنه من الصوف تضعه علي كتفها و تلفه متجاهلة رأسها .

و يا للعجب لا اعرف ما السبب في أن مقاسات أقدام النساء رقيقة جدا في الغالب تجدها صغيرة
ترتدي هذه الكائنة حذاء رقيق الصنع يسمى صندل و هو أفضل ما وقعت عيني عليه من وقت رفسها لبابي معلنته غضبها من رفض السكرتيرة دخولها و مقابلتها لي بدون ميعاد مسبق ..

اسمي يوسف ، اعمل كاتب صحفي في جريدة اسمها غير مسموح لك بأن تعرفه
لنشاطي و انتشار كتاباتي أصبحت مشرف علي احد الأقسام المهمة في الجريدة
وهو قسم المرأة ..
انه منفى بالتأكيد
فبعد المقال المتفجر عن النظام و تعامله مع المتدينين و ثقافة شيل الذقن و ركب شنب
نُفيت إلى هنا و الاسم ترقية .
مازلت اكتب كتابات سياسية و أراسل بها احد رؤساء أقسام الجرائد المشهورة لينشرها تحت اسم

يوميات صراصير البلاعات.. للهروب من اضطهاد القرشانات

وهي مجموعة من المقالات التي لا تمط للسياسة بصلة اصلا ً
و لكن لان المتابعين اعتقدوا ان الموضوع تلميح علي النظام فقد نجح و كما يقولون كسر الدنيا
و لكنه موضوع بعيد عن السياسه تماما ً..

كانت هذه التأملات جائتني ليلا بعد مقابله الشردوحة لانها لم تعطيني فرصه حتى للتنفس عندما ضربت الباب صائحة

" ايووووووه اوعي كداا
انا عاوزه اقابل الستاز... انا جاية لسي الستاز
اوعي يابت كدا "

ورفست الباب متقدمة و سكرتيرتي خرساء لا تضع بنت شفة .

" العواف .. انت سي الستاز يوسف ؟ "

لولا انني تناولت جرعة من الرقة الحوائية في التليفون من زوجتي منذ قليل لكانت هذه الشردوحة جثة هامدة بالتأكيد.. و لكن لان اثر جرعة الرقة و الاهتمام التي تتعطف بها الزوجات احيانا علي ازواجهن مازالت تجري في دمي فقد تقبلت هذه الدخلة البهيمية الجموسية البقرية..
قلت :

" ايوا ياست انا يوسف اتفضلي
خلاص يا سنية مفيش حاجة انتفضلي انت "

سنية هي سكرتيرتي الرقيقة التي دوما تعلن غضبها على من سماها سنية.. و هو بالطبع ليس أبوها ولا أمها و لكن جارتهم التي حلفت الايمانات علي أن تكون المولودة علي اسم جدتها الكبرى .

- " اتفضلي اقعدي يا ست .... اسم حضرتك ايه ؟ "
و جلست فطاطا الكرسي الضعيف معلناً من البكاء و العويل و المعاناة ما لا ييستطيع تحمله الاشداء

- " نسمه "

(( وحيات امك ؟ )) في عقلي

- " نعم ؟!! مين يا فندم "
- " نـسمه ..ايه انت سمعك تقيل !!
لا بقولك ايه احنا عاوزينك تصحصح كدا عشان الموضوع "

- " انتوا مين يا فندم هو في حد مستخبي تحت البطانية اللي انت لابساها ؟ "

هاهاها وكأنها عفريت المصباح

- " دانت ابن نكته زي ما سي الستاز شريف بيقول عليك "

(( اه يابن الانبوبه ياشريف بقا شريف هو اللي بعتك ليا))

- " شريف مين يا فندم ؟ شريف عبد الله في الاهرام ؟ "
- " ايووا براوه عليك هو ده "

- " طيب ايه الخدمه اللي اقدر اقدمها لحضرتك "

- " بص ياسي الستاز
بالصلاتو علي النبي كدا انا عاوزة نكتب موذنكراتي "

’’ يتبع

من طرف **T.shahy** الأحد يناير 25, 2009 2:52 pm

يتبع ايه بس
دا اذا مكانش الراجل الله يرحمه بقي
ههههههههههههههههههههه

منتظرين الجديد
ثااااااااااانك يوووووووووو

من طرف **A.S.Shiko0o0o** الأحد يناير 25, 2009 6:26 pm

عوده حميده

ركز معانا حبه يا عم انت
وحشتنا بقى بقى

من طرف **Crespowbas** الأحد يناير 25, 2009 7:22 pm

ههههههههههههههههه

يكتب مزكرات الست ديه يا مصبتى

ههههههههههههههههههههههههههههههههههههههههههههههههههههههههههههههههههههههههههههههههههههههههههههههه

منور يا حبى

من طرف **RANEEM** الإثنين يناير 26, 2009 12:12 am

هههههههههههههههههههههههههههه
حلوه

من طرف **takatiko** الإثنين يناير 26, 2009 1:15 am

welcome back ya deboo wa7shtena

من طرف **DeBo0o** الإثنين يناير 26, 2009 3:17 pm

و انتو كمان وحشتونى قوى بجد ... يا رب دايما متجمعين و مع بعض على الحلوة و المرة و على طول ايد واحده

و ان شا الله مش هغيب تانى عنكو و هفضل متابع على طول يا احلى منتدى فى الدنيا كلها

انتظرونا فى كل ما هو جديد ....

ديبو يعود فى ثوبه الجديد

من طرف **takatiko** الإثنين يناير 26, 2009 9:44 pm

ديبو يعود فى ثوبه الجديد
حلو اوى التى شيرت ده

من طرف **MeRaMoRe** الثلاثاء يناير 27, 2009 4:27 am

ههههههههههههههه حلوه

مذكراتها؟؟؟ ليه يعني ماتتأخرش علينا عشان نعرف اخرتها

من طرف **Crespowbas** الثلاثاء يناير 27, 2009 1:31 pm

انا هتنى مستنى كتير يا عمنا ولا ايه

من طرف **DeBo0o** الخميس يناير 29, 2009 7:30 pm

كمن أصيب بشومة مفاجئة علي مقدمة الجبهة تراجعت مذعورا ً على الكرسي من هول المفاجأة .. فبعد عمالقة في السياسة و الحروب والأدب و الفن بل و الرقص أحيانا
جاء دور شردوحة لتكتب مذنكراتها
عفوا ً مذكراتها
آي مذكرات أيها الغريبة الشكل و الهيئة.. ماذا فعلتي كي تكتبي مذكرات
من أنت في الأساس
بدأت في مداعبة شاربي بأصابعي في عصبية , لاكتشف انني في الثلاثين من عمري و لم اطلق شاربي مطلقا .. فكنت دوما بلا شارب .
- " انت يا سي الستاز يوسف.. سرحت فين ايوووه . "
صحت في فزع ..
- " ايوا .. مع حضرتك انا اسف سرحت شويه.. طيب ممكن اعرف طبيعة عملك و دراستك في آي مجال .. "
- " ناااعم ياسي عمر ؟؟!! "
ووقفت تهتز واضعه يدها في منتصفها
- " عمر مين حضرتك انا اسمي يوسف .. "
انت هاترطم لي بالوحوي من اولها
(( وحوي يابنت الجهلة ))
- " مين يافندم ؟ "
- " وحوي..... ايه متعرفش الوحوي !! "
- " ايوه يافندم تقصدي النحوي يعني ؟؟ "
- " هو دا النحوي براوه عليك ياسي يوسف "
طيب حضرتك اتفضلي انت اتعصبتي ليه انا بس عاوز اعرف المزيد عنك و عن حياتك
تاني هاترطملي بقولك ايه كلمني عربي و خلي مزيدنا في دقيقنا كدا "
حاضر يا فندم انت بتشتغلي ايه ؟
ولا حاجه
متعلمة ؟
هع هع هاهاها ( صوت ضحكات حشاشين ) لا ببصم
متزوجه ؟
لا ارملة و جوزي ميت من زمان ..
استهواني استكشاف هذه الكائنة الغريبة جدا فقد كانت بكل ما فيها من لسان سليط و منظر قبيح لا تخلو من خفة و روح مرحة و عيون بجحة جريئة فحوارها دائما به شد و جذب و انا اعشق مثل هذه الاحاديث .. هل سأتمادي في هذه المسرحية الكئيبة و اكتب مذكرات هذه الشمطاء
طيب ممكن اسأل حضرتك سؤال محرج بس لو سمحتي من غير عصبية
قول
انت ليه عاوزة تكتبي مذكراتك
اللي اعرفه ان الناس اللي بتكتب مذكراتها مروا بأحداث مهمة في حياتهم زي سجن او حروب او كانوا مشاهير في الادب و السينما و الفن
انتي عاوزة تكتبي مذكراتك ليه
هو انت فاكرني مش زي الناس دي ولا ايه
د انا اسوق شارع من الناس اللي انت بتقول عليهم دول
انت متعرفش نسمة برم ابعد بعيد لتتفرم
حصلنا الكفتة يافندم.. قصدي الشرف
لاا د انا اجرام اجرام يعني.. اجرام علي حق.. د انا مصيبي كتير
نعم ؟ ازاي يا فندم
مبلاش يا فندي دي وخلينا نتكلم بالعربي
طيب يا ست نسمة ( و لساني يقطر دموعا علي اهانة هذا الاسم الرقيق )
اتفضلي
بص انا اول جرايمي بعد موت امي وهي بتولدني
عملتها و كنت بنت 4 شهور

يتبع

من طرف **Crespowbas** الخميس يناير 29, 2009 8:12 pm

هنشوف جريمتها كانت ازاى ديه كمان دة مش بعدي تكون دبحت حد

معاك معاك يا ريس

وكمل ومتتاخرشى ونبى

من طرف **takatiko** الجمعة يناير 30, 2009 12:23 am

الله 4 شهور دى بدات الكفاح بدرى اوى

من طرف **RANEEM** الجمعة يناير 30, 2009 1:59 am

4 شهور طب قول سنه
شكلها مصيبه

من طرف **MeRaMoRe** الجمعة يناير 30, 2009 3:22 am

هههههههههههههههههه 4 شهور لا حول ولا قوة الا بالله

دي عملت ايه دي ؟؟؟

من طرف **DeBo0o** الجمعة يناير 30, 2009 10:06 pm

يبدو أنني سأرجع إلى الخلف مذعورا ً مع كل مفاجأة منها ..
آي نوع من البشر يستطيع افتعال وإيقاع المصائب في سن 4 شهور .. في وقت جل ما يستطيع فعله الأطفال من مصائب هو إهدار كميات متفاوتة من الحفاضات ..

و يأتي صوتها مره أخرى صارخا في أذني
" أنت يا سي الستاز اللي واخد عقلك بتسرح فين "
معاكي كملي .."
يعني خلاص هاتكتب لي مذنكراتي "
اولا اسمها مذكراتي "
طيب خلاص .. بتفكرني بالراجل اللي كانت فايزه احمد بتغنيلة بهجت هوز حط الكمون
تجاهلت ما قالته خوفا من أن يكون إعلانها عن غضبها المرة القادمة ضربة قوية بالقدم في مكان مؤلم ..
اعتدلت علي الكرسي و أمسكت بقلم وأمامي أوراق بيضاء بدون سطور فأنا اعشق الكتابة علي ورق ابيض بدون سطور .. ربما تكون فرصة جيدة للتنقيب في عقل هذه الكائنات علنا نجد منجم أثري للفحم ..
كما أنها فرصة جيدة لكسر الوقت و التسلية ..

" هااا و بعدين يا أستاذ يوسف إيه اللي حصل !! "
انتزعني ذلك الصوت العميق من الحالة التي كنت فيها و أنا أقص الأحداث ..
اسمي يوسف ... كنت اعمل صحفي و كاتب في جريدة مازال اسمها غير مسموح لك أن تعرفه , ارتدي بنطلون و قميص ازرق غامق و طاقية من نفس اللون.. و علي صدري لطعة كبيرة بها رقم ابيض.. و حولي من البراغيث و صنوف الحشرات الطائرة و القارضة ما يكفى لإرهاب جيش دولة كبرى ..
تم سجني لمدة 3 سنوات مازلت في السنة الأولى..
" هاا كمل يا استاذ يوسف شوقتنا .. و قبلت تكتب لها مذكراتها "
كان هذا الحج احمد رجل ينتمي لفكر سياسي معين سجين معي منذ فترة دخولي بتهمة التحريض علي انقلاب سياسي و توزيع منشورات و مطبوعات ضد النظام
بالطبع لم يحدث اي من هذا الهراء ..
" ايوا قبلت و بدأت فعلا ً اكتب لكن البداية كانت صعبة كمان كان صعب اقول انها مذكرات سيدة شعبية شردوحة .. اكيد هيقلل من قيمة الجريدة و قيمة ما اكتبه
فقررت اني اكتبها علي هيئة سلسلة من الحلقات الاسبوعية في الجريدة علي انها قصة "
وكانت البداية
تركت الجو الكئيب حولي و الروائح النتنه التي تعانق المكان و ذهبت بخيالي مرة اخري الي مكتبي الانيق ..
" قولي يا ست نسمة بس تحكي بالتفاصيل.. الاول احكيلي علي المصيبة اللي انت عملتيها و انت في سن 4 شهور .. "
" صلي بينا علي النبي "
" عليه افضل الصلاة والسلام "
بقا بعد موت امي و هي بتولدني
ابويا كرهني و قال عليا نحس و وشي فقر .
حتى اخواتي الكبار كرهوني و مفيش حد كان بيهشكني ولا بيشلني و انا صغيرة
كانوا بيرموني علي الكنبة و خلاص ..
و في يوم زي ما بيحكولي قعد اعيط و اصوت زي النعجة اللي عليها الطلق .
و بعدين لما ابويا زهق من صوتي قام يشوفني بصرخ ليه
لقاني مغرقة الدنيا لامواخذة يعني ..
و بيوطي عشان يشيلني و انا مش متعوده علي كدا قمت هووووب
رافسه برجلي راحت صواعب رجلي جت في نن عينه اليمين ..
طيب و دي مصيبة , عادي مش شايف فيها حاجة .. "
ماهو لما خدوه للدكتور عشان يكشف كان مش شايف حاجة و الدكتور قاله القصب البصري راح و مش هاتشوف بيها تاني
بقا احول بعين وحده يعني

’’ يتبع

من طرف **takatiko** الجمعة يناير 30, 2009 10:36 pm

ههههههههههههههههههههههه
يالهوى دى بادت حياتها بجنحة (مش اسمها جنحة برضه؟؟؟؟؟؟؟؟؟؟؟؟)

من طرف زائر السبت يناير 31, 2009 12:29 am

جامده أووووووووي
بالذات مذنكراتي دي
عجبتني أوي أوي أوي وخرجتني من مود مش تمام
معاك يا باشا

من طرف **A.S.Shiko0o0o** السبت يناير 31, 2009 1:32 am

ههههههههههههههههههههه

اه جُنحه يا تك تك

هههههههههههههههههههه

من طرف **Crespowbas** السبت يناير 31, 2009 1:15 pm

ينهارها المهبب بطين

ربنا يسترها بقى

من طرف **DeBo0o** السبت يناير 31, 2009 9:08 pm

" القصب البصري ؟!! طيب ما تركبوله زعزوعة "

يبدو ان ما اعرفه من لغة عربية سيتم اعدامه رميا ً بالشباشب علي يد هذه الشردوحة المسماة كذبا و افتراء بـ نسمة ..
" بصي ياست نسمة انا عاوز التفاصيل الدقيقة لاني خلاص قررت اكتب المذكرات بتاعتك و هانشرها في الجريدة ياريت ادق التفاصيل "
" انت تأمر يا عسل "
" طيب مفيش دور واجب كدا طلاما القعدة هاتطول "
" انا اسف جدا معلش الكلام خدنا.. تشربي ايه "
" شاي في الخمسينة .. "
ومالت على المكتب كمن يبوح بسر خطير
" بقولك ايه ياسي الستاز .. مفيش عندك شيشه هنااا "
اللعنه .. سحقا ... الجحيم .. شيشه ايتها المرأة ؟!!
الحمد لله انها لم تخرج دبوس حشيش او لفافة بانجو و تدعوني للف سيجارتين لتعمير الطاسه
" لا للاسف مفيش شيشة هنا ..كملي ايه اللي حصل لوالدك .."
بص انا حاكحيلك من الاوو......

السح اد امبوه
ادي الواد لابوه
يعيني الواد بيعيط

ادخلت يدها اليمني تحت الشئ الغريب الذي ترتديه و اخرجت موبايل حديث النشأة و قالت
الوو
ايوا يابني
اه

اه
اه
تصدقوا انتوا ولا د كلب كلكم دانا هاكل كرشك لما اجيلك
غووور ..

ارتعدت خوفا وانا اقول ..
خير ياست نسمة في ايه
سيبك ولا يهمك دول ناس رمم ..
بس حلوة رنت الموبايل
دا الحج احمد عدوية .. دا المعلم الكبير سلطان الطرب مش تقولي شغل الفرافير و العيال اللي بتزحلق شعرها بسمنة بلدي .. ولا الواد الجربان اللي اسمه محمد منير
تحس انه مولود في ماسورة مجاري ...
ونعم الذوق و الفن و الاحساس .. احسنتي الاختيار
متشكرين يا زوق
كملي يا ست نسمة ..
بص بقا انا يوم ما تولدت بيقولوا انه كان يوم فقر
في راجل جارنا مات بالسكته القلبية
و عيل صغير عربية فرمتة و هو بيلعب في الحارة
في بقا ست من جيراننا كانت بتشوي سمك قام الفرن هابب في وشها حرقها
كمان خالي جاله اسهال يومها و نقلوه المستشفى
اما امي بقا
ماتت و هي بتولدني
ربنا يرحمهم جميعا ً ... و الدكتور .. اعتقد جاله ايدز

دكتور ؟؟ نعااااام ياعمر
هو احنا وش ذذلك ولا احنا وش ذلك
المرة اللي تتكشف علي دكتور عندنا يبقى الموت اهون لها
و نعم الاخلاق ياست نسمة
طيب كانت دايه صح
اه ام شندي الدايه
و بعدين
بعد ما امي ماتت و نص الشارع مات
م انا فقر من يومي هع هع هع ابويا كرهني و اخواتي كرهوني
بس انا عورت ابويا و خليته بعين وحده عشان يبطل يكرهني تاني
الله يرحمه بقا
وقع من علي السلم و هو نازل لما كانت عينية التانية وارمة من خناقة فمشفش السلم ووقع مات ..
د انت سرك باتع
الخناقه كمان كانت بسببي
اصلي قرمت دراع بت من العيال اللي في الشارع
يعني ايه قرمت ؟؟
يعني عضيتها
نعااااااااااااام ياعمر ...... اسف.. قصدي ليه
ماهما السبب كانوا بياكلوا اكلي و يجيبوا اللحمة و ياكلوها و ميدونيش منها
كلهم بيكرهوني يا سي الستاز
قمت لقيت بت من العيال اللي كنت بلعب معاهم في الشارع معاها شندوتش غرقات لتمة عينه لحمه
هاتي حته يابت .. مش عاوزة تديني
يابت هاتي حته ..مش عاوزه تديني
قمت هابره منها الشندوتش كله ورحت زلطاااه
البت جت تعمل عليا راجل و عاوزة تضربني
جرتها من شعرها و رحت قرماها في دراعها
و طبعا ابوها اتخانق مع ابوكي

براوه عليك يا سي الستاز
و قام الراجل لاكشة بالبونية في نن عينه اللي مش عوره
بقا اعور و عينة التانيه وارمه
وهو نازل من السلم قام مدلوق زي الجردل و مات ..
تك تك
خبطات علي الباب و عم إبراهيم الساعي يدخل بالشاي ..
تهب واقفة و عم إبراهيم يرميها بنظرات غريبة كمن يقول:
ايه اللي جاب الأشكال دي هنا ...
أما هي فقد هبت واقفة تقول
عنك ياخويا ..عنك ..
و وضعت الشاي أمامي .. و انصرف عم إبراهيم
سألتها و أنا ارشف من الشاي ..
طيب قوليلي أنت رحتي مدارس
هااااااااااااع هااااااااااااع هااااااااااااع هاهاهاهاها
لم تجاوبني إلا بتلك الأصوات القوية

’’ يتبع

من طرف **RANEEM** الأحد فبراير 01, 2009 5:55 pm

هههههههههههههههههههه
دي طلعت مصيبه
هيه دي وش مدارس

من طرف **DeBo0o** الخميس فبراير 05, 2009 1:57 am

لا و انتى الصادقه .. دى وش سلندر لسه واخد قطر بالحضن من يومين

المشكله ان القطر هو اللى ادغدغ و خرجت نسمه منها سليمه

قاهره العمالقه

تابعووووووووووووووونا

من طرف **DeBo0o** الأحد فبراير 08, 2009 10:07 pm

افهم من كدا ان انت مرحتيش مدارس

ولا كتاتيب و حياتك .. متصبر علي رزقك ياسي الستاز انت
اصل و انا صغيرة كنت رمه و عامله زي الربع جنية اللي واقع في بلاعة مجاري و صاحبة نتن و مستخسره في المجاري و عاوز يجيبه ..
كنت زي البرص بالظبط..
انا اول مرة اشوف ست بتقول علي نفسها كدا !!
طيب ماهو دي الحق ..هو انا هاجيب حاجه من عندي
انت شايف قدامك دلوقتي ايه ؟ فردة كوشت بتاعت جرار و مفرقعه .. صح
هاهاها
ايوا بس مهما كانت الست مش جميلة مفيش ست بتقول علي نفسها كدا
و بعدين الجمال ده شئ نسبي جدا ًَ
اه هو فسبي خالص ..
نسبي يعني مش كل الناس بتشوف الحاجة الحلوة حلوة
و مش كلهم بيشوفوا الوحش وحش
مالت يمينا لترى يدي و قالت :
انت متجوز ؟

اه
طيب معاك صورة للمحروسه مراتك
طبعا ً و اخرجت محفظتي كان بها صورة لزوجتي
حلوة زي القمر
اومال انت بتقول فسبي و نسبي و حاجات مش فاهماها
مع ان مراتك مش حوله يعني ولا عوره ..

طيب و دا ايه داخله بالموضوع
فسكتت
ثم قالت
يعني انت مراتك حلوة و بيضه ليه مخدش واحده عوره ولا سوده ولا محروقة ولا واخده بشله في وشها
طيب و انا اخد دي ليه
شفت اهو هو دا مربط الفرس
لما انت جيت تتجوز دورت علي واحده حلوه انما الوحشه لا و كوخه
انا اخترت دي عشان شفتها مناسبة ليا و حبيتها
طيب و الحول و السود و الكرت مين يحبهم و يتجوزهم
ياستي هو انتي شايفاني اعور قدامك و بعدين انا شفت واحده مناسبة ليا خلاص اتجوزها مالي بقا و مال الناس التانيين دول
افهم من كدا ان انتي تقصدي عشان انت وحشه متجوزتيش
لا انا اتجوزت بس بعد ما طلع عيني
د انا لو كان اتقدملي كلب اجرب كنت اتجوزته
انا اتجوزت و انا بنت تلاتين سنة يعني لما خللت في العنوسة زي الخيارة لما تحطها في بطرمان مخلل و تنساها ..
انتي تقصدي دلوقتي ان الوحشة مش بتتجوز و الحلوة بتتجوز
براوه عليك يا سي الستاز خدتها من علي طرف لساني

ايوا بس انا مش موافق علي الكلام ده كتير حلوين و مش متجوزين و كتير و حشين و اتجوزوا و هم صغيرين و بعدين قلنا الحلاوة و الجمال حاجة نسبية

انتابني في اول كلامي مع هذه الكائنة احساس انني اتحدث الي برميل طرشي معتق لا يفهم ولا يعي أي شيء
لكن مع مرور الوقت اكتشفت انها ليست بمثل ما تظهر به و يعتقد فيها الجميع
انها غبية بعض الشيء لكنها تفهم ..
و الله ياسي الستاز انا بقولك اللي قدامي
انا مشفتش واحده حلوة و عنزت
و مشفتش واحده وحشة و اتجوزت بدري كلهم بيخللوا
ايوا يمكن انت اللي قدامك كدا مش معناه ان انتي شفتي الدنيا كلها و شفتي مصر بحالها ..
احنا بنسبق الاحداث ليه
قوليلي بقا عن المدرسه رحتيها ولا لأ
زي ماقلت لك كنت عامله زي البرص و كنت رفيعة و انا صغيرة زي زعزوعة القصب
اطلع من البيت اول ما اقوم من النوم من غير ما اغسل وشي علي الشارع قدام البيت
نفضل طول النهار نلعب و ندب و نعجن في بعض لغاية المغرب و نروح زي الفراخ اللي واخده حقن
كل واحدة عليها كوم تراب لو نفضتها تنزل ردم من هدومها
ننام زي المساطيل عشان نصحى الصبح نلعب تاني
و في الاعياد
كان ابويا يجيب لنا كل واحد جزمة و هدوم للعيد
انا كل عيد فستان
و بس اللبس بقا من اخواتي الكبار
عمر ما جالي لبس الا فستان العيد
و سعات فستان العيد ان يكفيني 3 سنين لحد ما يصغير عليا
و بعدين
في يوم لقيت اختي الكبيرة داخله البيت و كنت بلعب و خلصت لعب
ببص عليها لقيتها بتعيط و فستانها كله دم
مالك يا بت
مش بترد عليا و نايمة علي السرير
قعدت تعيط لحد ما ابويا جه
اقوله اختي مالها مش عاوز يرد عليا
رحت ماسكه خشبة طويلة و جايه من ورا ابويا و طاااخ
علي دماغه
هااااا
فتحت قرنه و خيطوله في المستشفى و فضلت يومين هربانه عن الجيران
بعدها بسنة ابويا مات زي ما قلت لك علي السلم لما قرمت دراع البت
و بقيت من غير اب ولا ام
كان ابويا اتجوز بعد ما امي ماتت بس كانت طيبة و غلبانه .. فضلنا في البيت معاها و اخواتي الكبار كبروا و بقوا صنايعية و لما بقيت عندي 7 سنين قالوا يا علام
نوديها المدرسه ..
و انا ارفس و اصوت و لااا ابدا مش عاوزه اروح
لحد ما ضربوني و خدوني بالعافية ..

و بعدين
في اول يوم في المدرسة العيال كلها حلوين و نظاف و جمال
و انا زي السحلية لا بسه بنطلون بيجامه مخطط و سخ و مرقع تحت المريلة بتاعت اختي الكبيرة لما كانت قدي و عامله زي الهبلة
اتعقدت
اول ما دخلنا الفصل لقيت بت حلوة و قاعدة في التخته الاولي
و انا سمي و موتي البنات الحلوين
جريتها من شعرها قومتها
هوووووووووووووه انت معايا ياسي الستازز

معاكي جداا
كملي

بعد ما جريتها من شعرها زي النعجة قعدت مكانها
و دخلت الابله علينا
بيقولولها يا بث ولا مانا عارفه يا فث حاجه كدا مش فاكره يا خويا هو انا مخي دفتر
بس كانت ابلة زي لهطة القشطه

انت باين عليكي متعقده فعلا من الحلوين يا ست نسمة

ايوا و النبي يا خويا متعقدة منهم ..
و جت الابلة تعدي من قدامي و رحت ماده رجلي قامت هوووب متكعورة و واقعه علي بوزها في الارض و العيال قعدوا يضحكوا عليها
و طبعا طردوكي من المدرسة
لااا قالولي هاتي ابوكي بكرة قلتلهم ميت
قالولي امك قلتلهم ميته
فلما جابوا الستاز عبد الحميد جارنا اللي هوا مقدملي في المدرسة
و روحني البيت
قال لاخويا الكبير خلوها في البيت
دي بت بتاعت مشاكل و هاتفضحكم

’’ يتبع

من طرف **takatiko** الإثنين فبراير 16, 2009 1:14 am

هههههههههههههههههههههه
يعيش ديبو يعيش

من طرف **DeBo0o** الخميس فبراير 19, 2009 7:31 pm

و من يومها مرحتيش مدارس صح
اه ولا عتبتها و حياتك
و فضلت عايشه في بيت ابويا مع اخواتي و مرات ابويا القرشانه اللي كنت بكرهها عماا ..
هي كانت طيبة بس أنا كنت بكرهها
و كل يوم اطلع الشارع العب طول النهار... و الغمط وشي تراب و طين
اجي بالليل مرات ابويا تضربني و بعدين اقوم شتماها شويه .. و اختي تاخدني تحميني و تليفني و اكل و انام
لحد ما في يوم لقيتهم بيتشاوشوا و حسيت ان الكلام عليا
كانوا بيتشاوشوا علي ايه ؟

كانوا بيتفقوا عشان يـ..............
فأحمر وجهي نيابة عنها
كيف تكون سيدة بمثل هذه الجرأة حتى تنطق بكلمة مثل هذه أمام رجل لا تعرفه
و نطقت بصعوبة بالغة :
و بعدين كملي ...

و في يوم اخويا الكبير اخدني من الشارع و انا بلعب
كنت اكبر واحده في العيال اللي بتلعب في الشارع
و كنت زي ا منا الغوله شعري منكوش علي طول
اخدني قلت له عاوز ايه انا بلعب
قالي انا جبت لحمه تعالي عشان تاكلي
و انت طبعا عارف الفجعة اللي انا فيها لحمه لقيت ريقي بيجري و بطني بتزعول ولا مزيكت حسب الله ...
و اكلوني و انا فرحانه و بعدين لقيت اختي و مرات ابويا قالولي تعالي قيسي الفستان الجديد ده
دخلوا معقليل الادب الأوضه و بصيت لقيت وليه جارتنا اسمها ام حسن كانت دايه بتولد النسوان
قصدي الحريم يعني يا سي الستاز لامواخدة
و جايه نحيتي و انا بقيس الفستان
و عينك ماتشوف الا النور ايوا النبي يا سي الستاز راحوا مكتفيني و انا اصوت وارفس زي العجل بتاع العيد اللي بنتفرج عليه لما بيندبح عند الجزار
عرفت هما عاوزين يعملوا ايه اصلي كنت من يومي و انا مفتحة و نوره و بنت حنت ..
ارفس و اصوت وهما مش هنا خالص
و عملوا اللي عملوه و الفستان غرق دم
و يوميت تلات بقيت حلوه و رجعت العب في الشارع تاني ..
الا هو قولي يا سي الستاز
هو الحاجة دي غلط ولا صح

انتي شايفه ايه
ماهو كل الناس بتعمل كدا
خلاص اللي حصل بقا كملي
طيب قولي الاول صح ولا لأ
بصي يا ست نسمة
انتي حصل لك كدا صح
عندك بنات ؟

اه عندي اتنين
عملتي معاكم كدا
ايوااا
خلاص متشغليش دماغك بقا لو كان صح او غلط لان الموضوع مش هايفرق معاكي دلوقتي

بس برضوا قولي صح ولا لأ

صدقيني معرفش

تسسس ))
صوت يخرج من بين اسنان النساء مع لويه بوزز تعبيرا عن الاستهزار و السخريه
و قال ايه سي الستاز التاني بيقولي انت عارف كل حاجة

شعرت بالاهانة الشديدة من هذه الكائنة الشردوحة الغبية
ولكن لا يهم
الوقت يمر معها سريعا و الموضوع شيق و جديد
يستحق بلع اهانات خصوصا من كائنة لا تعي ماتقول ربما تقولها بحسن نية
كملي بس و سيبك مني
طيب
بعدين بقا و في يوم مرات ابويا قالت لي الشارع ده متهوبيهوش تاني
واتخانقت معقليل الادب و بطحتها بطوبه في نفوخها سيحت دمها
اختي فهتني و قالت لي عيب تلعبي و انتي كبيره كدا في الشارع انتي خلاص بقيتي عروسه
قلت ياسلام يعني هاتجوز و اغور من وشكم و فرحت
كنت فاكره بقا ان العرسان هيترموا عليا زكايب زكايب
محدش عبرني
علي ايه يا حسره
ابويا ميت و كان غلبان
و انا عامله زي البرص الجعان سوده و كوده و كرته
لحد مافي يوم حصل اهم حاجة بقا

ايه هيا اهم حاجة

الوليه جارتنا الدلاله ام ابراهيم جت يوم و قالت لمرات ابويا
عاوزه البت دي تطلع معقليل الادب في معزه و هديها خمسة جنيه
طبعا مرات ابويا زقططت بالخمسة جنيه و فرحت بيها
و قالت خديها
سحبتني الوليه زي الخروف و رحت معاها
قالت لي زي ماهاعمل تعملي
رحنا بيت فيه واحد ميت و الستات بيصوتوا فيه
و الوليه دخلت من هنا و نزلت صويت و لطم علي وشها و قالت لي اعملي زيي
و انا زيها اعمل
اصوت و الطم و اعدد علي الراجل اللي مات
و في الاخر روحنا كان زوري راح من كتر الصويت
معقول ؟ ؟

و كنتوا بتاخدوا فلوس علي الموضوع داا
كل ماحد يموت كنا نروح نصوت و نلطم و بعدين اخد الفلوس
كانت الاول مرات ابويا بتاخد الفلوس و بعدين قلت لها لو مجبتيش الفلوس مش رايحه معاكي
الولي عجبها صويتي و لطمي اصل انا صحة من يومي
طول بعرض و صوتي ولا مدفع رمضان

طيب كنتوا بتروحوا ازاي ؟ مجامله مثلا و بعدين الناس بيدواكوا فلوس ؟

لا دا شغل
واحد عنده ميت ييجي يقولها انا عندي ميت
هي تروح بقا و تجرجرني وراها نلطم و نصوت شويه و بعدين ناخد اللي فيه النصيب ؟
معقول

ايو والنعمه ياسي الستاز هو انا هاكذب عليك
طيب و ايه الفايدة يعني لما حد يموت و الصويت يبقا كتير عليه
يالهوووي
هو انت عاوز الراجل يموت من غير ما يتفقع عليه صويت خالص
دا كان يدخل جهنم حدف
ياست نسمه استغفر الله العظيم ايه علاقة دي ب دي
ماهو لو محدش صوت عليه يبقا كان راجل زفر و رمه و محدش بيحبه
يبقا كان حرامي ولا نصاب ولا شغال في كباريه
و هيدخل جهنم حدف

استغفر الله العظيم يارب
طيب كملي و سيبك من الحته دي خالص

كنت منهمك في كتابة بعض الجمل من كلامها الغريب حتى استطيع كتابه هذه المذكرات الغريبة بطريقة يقبلها الناس
حتي ان ما تقرأه الان لا يعد نصف ما قالته من كلام قبيح و غريب
ربما لتقريب الصورة اكثر تعمدت اللجوء الي بعض الالفاظ الفجة حتى يشعر القارئ بالشخصية اكثر ..

هاه سكتي ليه
كملي

في يوم جت و قالت لي
احنا هنروح لراجل اسمه كذا كذا
و هنعمل معاه مصيبة
نتخانق معاه و نفضحه في الشارع و نرمي بلانا عليه و نلم عليه الناس
قلت لها عز الطلب انا في الخدمه قشري انت بس وهلاقيــ ......

الله اكبر.. الله اكبر

صوت اذان الفجر له طابع خاص جدا و احساس مختلف عندما يشق ظلام الليل صوت المؤذن
و خصوصا عندما تكون في السجن حبيس الجدران فإن الصلاة في اوقاتها متعة و انتظارها مبتغى و أمل
تفرقنا الي حمامات السجن بعد جلستنا الطويلة طوال الليل احكي لهم حكايتي مع الشردوحة
تأثر الجميع حتى ان كل الموجودين لم ينام احد فيهم طوال الليل و ظلوا يستمعون في صمت و نحن جالسين علي ارض الزنزانه الكبيرة ( العنبر )
نفترش ارضا بطانية بنية اللون مصنوعة من الشوك تقريبا
تؤذي و تعذب اكثر ما تنفع
في بعض الاوقات يسمحون لنا بالصلاة جماعة في مسجد السجن الكبير
و احيانا لا يسمحون فنصلي في العنبر
و اوقات اخرى
لا يسمحون لنا مطلقا بالصلاة في الفجر و يغلقون ابوب الحمامات الداخلية للعنابر ..
و اثناء الوضوء مال احد المساجين علي صديقة و كنت اسمعه
و قال له :
يانهار اسود كل دا عشان يقولنا هو اتسجن ليه
قاعد واكل ودانا من الساعة 10 بالليل للفجر عشان يقولنا اتسجن ليه اعوذ بالله الجماعة الصحفيين دول بلعين راديو ..

يتبع

من طرف **A.S.Shiko0o0o** الخميس فبراير 19, 2009 8:06 pm

DeBo0o0oZ U R A BiG BrObLeM

يوميات شردوحه مصريه

يوميات شردوحه مصريه

رد: يوميات شردوحه مصريه

رد: يوميات شردوحه مصريه

رد: يوميات شردوحه مصريه

رد: يوميات شردوحه مصريه

رد: يوميات شردوحه مصريه

رد: يوميات شردوحه مصريه

رد: يوميات شردوحه مصريه

رد: يوميات شردوحه مصريه

رد: يوميات شردوحه مصريه

رد: يوميات شردوحه مصريه

رد: يوميات شردوحه مصريه

رد: يوميات شردوحه مصريه

رد: يوميات شردوحه مصريه

رد: يوميات شردوحه مصريه

رد: يوميات شردوحه مصريه

رد: يوميات شردوحه مصريه

رد: يوميات شردوحه مصريه

رد: يوميات شردوحه مصريه

رد: يوميات شردوحه مصريه

رد: يوميات شردوحه مصريه

رد: يوميات شردوحه مصريه

رد: يوميات شردوحه مصريه

رد: يوميات شردوحه مصريه

رد: يوميات شردوحه مصريه

رد: يوميات شردوحه مصريه

رد: يوميات شردوحه مصريه